İnşaatçıların əməyi yüksək qiymətləndirilib
10 Apr 2019
Aprelin 10-da FHN İşçilərinin Həmkarlar İttifaqının təşkilatçılığı ilə “İnşaatçılar Günü”nə həsr olunmuş tədbir keçirilib.
Giriş sözü söyləyən ittifaqın sədri Mehman İsmayılov zala
toplaşanları və onların simasında bütün inşaatçıları peşə bayramı münasibətilə
təbrik edib. Ölkə ərazisində aparılan
tikinti-quruculuq işlərinə FHN-in əməkdaşlarının da öz töhfələrini verdiklərini
vurğulayıb.
Bildirib ki, hər il ölkə inşaatçılarının peşə bayramının
təntənəli şəkildə qeyd olunması Azərbaycan Respublikasının Prezidenti cənab
İlham Əliyevın tikinti sektorunun inkişafına, bu sahədə çalışan insanların çətin
və şərəfli əməyinin layiqincə qiymətləndirilməsinə diqqət və qayğısının bariz
nümunəsidir.
Tədbirdə çıxış edən Azərbaycan Həmkarlar İttifaqları
Konfederasiyası (AHİK) sədrinin müavini Cavanşir Alxasov ölkəmizin böyük tikini
meydançasına çevrildiyini söyləyib. Aparılan tikinti-quruculuq, bərpa-abadlıq
işləri nəticəsində şəhər və kəndlərimizin simasının gözəlləşdiyini vurğulayıb.
Bütün bu nailiyyətlərdə FHN-in aidiyyəti qurumlarının da payının olduğunu diqqətə
çatdırıb. C.Alxasov tədbir iştirakçılarına uğurlar arzulayaraq onları peşə bayramı
münasibətilə təbrik edib.
FHN-in Tikintidə Təhlükəsizliyə Nəzarət Dövlət
Agentliyinin rəisi Cəbrayıl Xanlarov ölkəmizdə son illərdə həyata keçirilən
tikinti-quruculuq işləri barədə məlumat verərək tikinti sektorunun
iqtisadiyyatda oynadığı əhəmiyyətli roldan danışıb. Bildirib ki, dövlət
başçısının qayğı və diqqəti inşaatçıları daha məhsuldar fəaliyyətə sövq edir.
Sonra FHN-in Əsaslı Tikinti İdarəsində, Tikintidə Təhlükəsizliyə
Nəzarət Dövlət Agentliyinin aparat və qurumlarında çalışan və vəzifə borcunu
layiqincə yerinə yetirməkdə xüsusilə fərqlənmiş, eləcə də yubiley yaşları tamam
olan bir qrup əməkdaşına ittifaqın Fəxri Fərman və qiymətli hədiyyələri təqdim
olunub. Bundan əlavə, bir neçə əməkdaş AHİK-in Fəxri fərmanları ilə təltif edilib.
