Qəbul imtahanında yüksək bal toplayan abituriyentlər Metropoliten İşçiləri Həmkarlar İttifaqı tərəfindən mükafatlandırıldı
09 Sep 2018
Metropoliten İşçiləri Həmkarlar İttifaqı 2015-ci ildən başlayaraq, metropolitençi övladlarının təhsilə marağını artırmaq və həvəsləndirmək məqsədilə 600 və daha çox bal toplayaraq ali məktəblərə qəbul olan tələbələrə birdəfəlik mükafat (təqaüd) verilməsini təşkil edir.
MİHİ-nin İcraiyyə Komitəsinin qərarı ilə 2015-ci
ildən etibarən hər il Respublikanın ali məktəblərinə qəbul imtahanları
keçirildikdən sonra qeyd edilən məsələ ilə bağlı müvafiq araşdırmalar aparılır,
namizədlər müəyyən edilir və sentyabr ayında yeni dərs ilinin ərəfəsində onların təntənəli şəkildə mükafatlandırılması
həyata keçirilir.
Hər il olduğu kimi bu il də MİHİ metropolitençi ailələri
və onların yüksək balla ali məktəblərə daxil olan övladları ilə görüş keçirildi.
Görüşdə çıxış edən MİHİ-nin Sədri Arif Mərdanov qeyd etdi ki, bu il
metropolitençi ailələrindən 14 gənc yüksək nəticə əldə edərək tələbə adını
qazanıb. onlardan 12 nəfəri 600-dən çox bal toplayaraq ölkənin müxtəlif ali məktəblərinin
tələbə biletini alacaqlar. Sədr bildirdi ki, bu ildən etibarən MİHİ-nin İK-nin
qərarı ilə V ixtisas qrupu üzrə imtahan vermiş və yüksək nəticə göstərmiş
metropolitençi övladları da mükafatlandırılacaqlar. Çünki V ixtisas qrupunda
bal sistemi digər qruplarda (I-II-III-IV) tətbiq edilən bal sistemindən fərqlidir.
İki nəfər metropoliten işçisinin övladı məhz V qrup üzrə imtahanlarda iştirak
edərək yüksək nəticə göstərib.
A.Mərdanov ali məktəb auditoriyalarına ilk dəfə
daxil olacaq gəncləri, başda Azərbaycan
Həmkarlar İttifaqları Konfederasiyasının sədri, millət vəkili Səttar Möhbalıyev
və “Bakı Metropoliteni” QSC-nin sədri Zaur Hüseynov olmaqla, bütün
metropolitençilər adından təbrik etdi.
Sonra yüksək nəticə əldə edərək, tələbə adını
qazanmış gənclərə təşkilatın mükafatları təqdim edildi.
Tədbirdə çıxış edənlər AHİK-in və “Bakı Metropoliteni” QSC-nin rəhbərliyinə
və Metropoliten İşçiləri Həmkarlar İttifaqına təşəkkürlərini bildirdilər.
