AHİK-də Rusiya həmkarlar ittifaqlarının nümayəndə heyəti ilə görüş keçirilib
10 Jul 2017
2017-ci il iyulun 10-da AHİK-in sədri, Milli Məclisin deputatı, Beynəlxalq Həmkarlar İttifaqları Konfederasiyasının vitse-prezidenti Səttar Möhbalıyev respublikamızda səfərdə olan Sankt-Peterburq və Leninqrad Vilayəti Həmkarlar İttifaqları Federasiyasının nümayəndə heyətini qəbul edib.
AHİK
sədri Rusiyanın ən böyük regionlarından birinin – Sankt-Peterburq və Leninqrad
Vilayətinin nümayəndələri ilə görüşdən məmnunluğunu ifadə edib və minlərlə azərbaycanlının
yaşadığı regiondan gəlmiş qonaqları səmimi salamlayıb. Qeyd edib ki, Azərbaycanla
Rusiya arasındakı əlaqələr son illər ardıcıl surətdə inkişaf edir, ticarət və
iqtisadi əməkdaşlıq sahəsində yüksək dinamika müşahidə olunur. Ölkələrimiz
arasındakı əlaqələr müxtəlif sahələrdə strareji tərəfdaşlar qismində inkişaf
edir, bu isə hər iki ölkənin liderlərinin – Prezidentlər İlham Əliyevin və Vladimir
Putinin birgə səyləri nəticəsində mumkun olubdur. Bir çox beynəlxalq və regional problemlərin həlli
istiqamətində bizim dövlət başçılarımız eyni mövqedən çıxış edirlər.
S.Möhbalıyev Azərbaycan və Rusiya həmkarıar
ittifaqı mərkəzlərini narahat edən bir
sıra məsələlərə toxunaraq AHİK-in mövqeyini qonaqların diqqətinə çatdırıb. Bu,
ilk növbədə əməkçi miqrantların hüquqlarına riayət edilməsi problemi ilə
bağlıdır. Həmin məsələdən danışarkən AHİK sədri vurqulayıb ki, hər iki tərəfin
həmkarlar ittifaqları qeyri-leqal işçi qüvvəsinin hüquqlarının pozulmasına
qarşı əzmlə mübarizə aparmalıdırlar. Əməkçi
miqrantların həmkarlar ittifaqlarına cəlb edilməsi, həmkarlar ittifaqı mərkəzləri,
sahə qurumları arasında əlaqələrin möhkəmləndirilməsi, əməkçi miqrantların
sosial-iqtisadi problemlərinin həlli üzrə milli və sahə sazişlərinin bağlanması
həmkarlar ittifaqlarının fəaliyyətində mühüm yer tutmalıdır. Bizim bir sıra sahə
həmkarlar ittifaqlarımız adı gedən problemlərlə bağlı Rusiyanın, Özbəkistanın,
Qazaxıstanın, Serbiyanın, Bosniya və Hersoqovinanın həmkarlar ittifaqları ilə
artıq belə sazişlər imzalayıblar. 2011-ci ilin martında Ekaterinburqda Rusiya Müstəqil Həmkarlar İttifaqları
Federasiyasının iştirakı ilə Sverdlovsk Vilayətinin Həmkarlar İttifaqları
Federasiyası və Azərbaycan Həmkarlar İttifaqları Federasiyası arasında əməkçi
miqrantların hüquqlarının müdafiəsi üzrə əməkdaşlıq haqqında Müqavilə
imzalanıbdır. Bir müddət sonra isə eyni məzmunlu Müqavilə Həştərxan Vilayətinin
Həmkarlar ittifaqı mərkəzi ilə bağlanıbdır.
S.Möhbalıyev
daha sonra bildirib ki, bugünkü görüşün əsas məqsədi ikitərəfli əməkdaşlığımızın
daha da inkişafı, həmkarlar ittifaqı üzvlərimizin və onların ailələrinin
istirahətnin və sağlamlığının təşkil edilməsidir. Biz əməkdaşlığımızı muzdlu
işçilərin hüquqlarının və maraqlarının qorunması sahəsində həmkarlar
ittifaqlarının təcrübə mübadiləsi işinə yönəltməyə planlaşdırırıq. Çalışacağıq
ki, əmək miqrantlarının hüquqlarının qorunması sahəsindəki prinsipial məsələlərdə
öz mövqeyimizi və fəaliyyətimizi razılaşdıraq. Bütün bunlar isə bizim əməkdaşlıq
haqqında ikirərəfli müqaviləmizdə öz əksini tapmalıdır.
Söhbət
əsnasında AHİK sədri qonaqlara Azərbaycan Həmkarlar İttifaqlarının strukturu və
fəaliyyəti haqqında da məlumat veribdir.
Rusiya
nümayəndə heyətinin rəhbəri V.Derbin səmimi qəbul üçün S.Möhbalıyevə öz təşəkkürünü
bildirib, həmkarlar ittifaqı mərkəzlərimiz arasında ikitərəfli əlaqələrin və əməkdaşlığın
bundan sonra daha da səmərəli olacağına
və genişlənəcəyinə əminliyini ifadə
edib.
Rusiyalı
qonaqlar görüşdən öncə Fəxri Xiyabanda Ulu Öndər Heydər Əliyevin məzarını zyarət
edərək üzərinə gül dəstələri qoymuş, həmçinin görkəmli oftalmoloq alim,
akademik Zərifə xanım Əliyevanın da məzarə üstünə tər güllər düzmüşlər. Daha
sonra Şəhidlər Xiyabanına gedən qonaqlar xalqımızın azadlığı uğrunda
canlarından keçən şəhidlərimizin xatirəsini anmışlar.
