AHİK sədri Həmkarlar İttifaqlarının Nabrandakı istirahər mərkəzlərinə baxış keçirib
09 Aug 2018
Avqustun 9-da Azərbaycan Həmkarlar İttifaqları Konfederasiyasının sədri, Milli Məclisin deputatı Səttar Möhbalıyev AHİK-in Nabranda yerləşən istirahət mərkəzlərindəki vəziyyətlə tanış olub.
İlk öncə Təhsil işçiləri Azad Həmkarlar İttifaqının “Təhsil”
istirahət mərkəzinə baş çəkən AHİK sədri buradakı yaşayış korpuslarını gəzib, yataq
otaqlarının şəraitinə baxıb, infrastrukturla tanış olub.
Məlumat üçün deyək ki, bu mərkəz AHİK-in maddi-mənəvi dəstəyi
ilə və Təhsil İşçiləri Azad Həmkarlar İttifaqının vəsaiti hesabına 2013-cü ildə
inşa edilərək həmkarlar ittifaqı üzvlərinin sərəncamına verilib. Nabranın
axar-baxarlı güşəsində yerləşən istirahət ocağı 10 hektardan artıq sahəsi olan ərazidə
qərar tutub. Əraziyə üçmərtəbəli yaşayış korpusu, kotteclər, yeməkxana, idman
zalı, futbol və voleybol meydançası, açıq və qapalı üzgüçülük hovuzu və digər
tikililər daxildir. İstirahət mərkəzində eyni vaxtda 260 nəfərin istirahət etmək
imkanı vardır. Ümumilikdə isə mövsüm ərzində burada 1500 nəfərə yaxın həmkarlar
ittifaqı üzvü dincəlir. “Təhsil” istirahət mərkəzinin yerləşdiyi ərazi təbiət
baxımından da zəngindir. Dörd bir tərəfdən meşə massivi ilə əhatə olunmuş
istirahət mərkəzinin ərazisindən keçən çay və ərazinin biomüxtəlifliyinin
qorunub saxlanması mərkəzi istirahət üçün əlverişli məkana çevirir.
AHİK sədri burada istirahət edənlərlə söhbətləşib. Rəylərini,
təkliflərini dinləyib. Şəraitləri ilə, qidalarının keyfiyyəti ilə maraqlanıb. Bildirib
ki, üzvlərinin sayına görə AHİK-in ən böyük üzv təşkilat olan Təhsil İşçiləri
Azad Həmkarlar İttifaqının ərsəyə gətirdiyi bu istirahət ocağı insanların öz
ailə üzvləri ilə birgə istirahət etməsi, gərgin dərs ilindən sonra səfalı guşədə
dincəlməsi üçün gözəl şəraitə malik bir məkandır.
AHİK sədri Azərbaycan
Dövlət İdarələri və İctimai Xidmət İşçiləri Həmkarlar İttifaqının “Ülfət” istirahət
mərkəzində də olub. Bu istirahət ocağı 4,3 hektar ərazidə inşa olunub. 2010-cu
ilin avqustunda açılışı olub. Dənizə 1 kilometr məsafədə yerləşən mərkəzdə 6 ədəd
kottec və 3 ədəd ikimərtəbəli istirahət korpusu yerləşir. Burada eyni vaxtda 100
nəfər, mövsüm ərzində isə 1000 nəfərə yaxın insan istirahət edə bilir. Müasir
standartlara cavab verən 2 və 4 nəfərlik nömrələr isti-soyuq su, duşkabin, TV və
peyk antenna, soyuducu, zəruri mebel və yataq dəstləri ilə təchiz olunub.
Ərazidə geniş yeməkxana, böyüklər və uşaqlar üçün hovuz, uşaq əyləncə mərkəzi, istirahət
güşələri, açıq tennis kortu və voleybol meydançası inşa edilib. İstirahət edənləri
fasiləsiz keyfiyyətli su ilə təchiz etmək üçün 2 ədəd artezian su quyusu
vurulub, fasiləsiz enerji ilə təchiz etmək üçün generatorlar quraşdırılıb. 1
hektardan artıq ərazidə dekorativ və meyvə ağacları əkilib, yaşıllaşdırma işləri
aparılıb. “Ülfət” istirahət mərkəzi mövsüm ərzində 1000 nəfərə yaxın həmkarlar
ittifaqı üzvünə xidmət edir.
S.Möhbalıyev
Dəmiryolçuların Müstəqil Həmkarlar İttifaqının “Lokomotiv” istirahət mərkəzində
də şəraitlə tanış olub. AHİK sədrinə məlumat verilib ki, dəmiryolçuların və
onların ailə üzvlərinin mənalı istrirahətinin təşkil edilməsi üçün 2005-ci ildə
Nabranda istirahət mərkəzinin tikintisi məqsədilə torpaq sahəsi ayrılıb. Həmin torpaq
sahəsində ilkin olaraq 80 nəfərlik üç istirahət korpusu, 200 nəfərlik yeməkxana
tikilib və 2008-ci ilin avqust ayında istifadəyə verilib. Həmçinin, istirahət mərkəzininin
daimi elektrik enerjisi ilə təmin edilməsi üçün əlavə elektrik generatoru quraşdırılıb,
içməlı su ilə təmin olunması üçün su quyusu vurulub. Sonrakı illərdə istirahət
mərkəzində əlavə iki korpus, 300 nəfərlik tutumu olan böyüklər və uşaqlar üçün
çimərlik hovuzu tikilib. Bundan başqa müasir tələblərə cavab verən örtülü
voleybol zalı, tennis zalı, fitnes-trenajor zalı, mini-futbol və voleybol
meydançası bütün avadanlıqlarla təchiz olunmaqla dəmiryolçuların istifadəsinə
verilib. İstirahət mərkəzinin ərazisi abadlaşdırılıb, gül, dekorativ kollar və
ağaclar əkilib. Ərazidə dəmiryolçuların istirahəti üçün oturacaqlar quraşdırılıb
və istirahət üçün tam şərait yaradılıb.
Təsdiq olunmuş tikinti-smeta layihə sənədlərinə əsasən
210 nəfərlik hər birində iki ailə yerləşməklə altı kottec tipli ev, 32 nəfərlik
böyük istirahət korpusunun tikintisinin başa çatdırılması növbəti il üçün nəzərdə
tutulubİstirahət mərkəzinin ərazisində istirahət edənlərin rahatlığı üçün əlavə
xidməti otaqları tikilmiş və bar-diskoteka tipli çay evi fəaliyyət göstərir.
Uşaqlar üçün avadanlıqlarla təchiz olunmuş istirahət oyun meydançası yaradılıb.
“Lokomotiv” istirahət mərkəzində mövsüm ərzində 1000 nəfər
həmkarlar ittifaqı üzvü dincələ bilir.
S.Möhbalıyev Nabrandakı “Xəzər” pansionatında da olub. 23
hektar əraziyə malik bu pansionat həmkarlar ittifaqlarının “veteran” istirahət
ocaqlarındandır. AHİK sədri buradakı yaşayış korpuslarının, digər
infrastrukturların vəziyyəti ilə tanış olub.
AHİK sədri Səhiyyə İşçiləri Həmkarlar İttifaqının Qusarda
fəaliyyət göstərən “Şəfa-Qusar” istirahət mərkəzinə gedib. Bir neçə il bundan
öncə istifadəyə verilmiş mərkəzdə tibb işçilərinin dolğun və səmərəli istirahəti
üçün hər bir şərait yaradılıb. Qusarın təmiz dağ havası ilə zəngin olan yüksəkliyində
yerləşən pansionat yataq korpusu, yeməkxanası, həyətindəki göz oxşayan
yaşıllıqlarla və istirahət güşələri ilə diqqəti cəlb edir. Bu şəfa ocağı mövsüm
ərzində 1000 nəfərə qədər səhiyyə işçisini qəbul edib onlara yüksək xidmət göstərir.
Səttar Möhbalıyev baxış keçirdiyi istirahət mərkəzlərində
dincələn insanlarla söhbətlərində dövlətimizin, ölkə Prezidenti cənab İlham Əliyevin öz vətəndaşlarına göstərdiyi
diqqət və qayğısından danışıb. Bildirib ki, həmkarlar ittifaqı üzvlərinin,
onların ailələrinin sağlamlığına qayğı göstərilməsi, sanatoriya-kurort müalicəsinin
və istirahətlərinin təşkili istiqamətində tədbirlər bundan sonra da davam
etdiriləcək.
Konfederasiya sədri vurğulayıb ki, istirahət mərkəzlərinə
edilən bu səfərlərin məqsədi buradakı şəraitlə yerində tanış olmaq, bu şəfa
ocaqlarının necə saxlanılmasına, göstərilən xidmətin səviyyəsinə nəzarət etməkdən
ibarətdir. Özünüz gördüyünüz kimi, pansionatlar bütün zəruri avadanlıqlarla, o
cümlədən, tibb məntəqələri, istirahət güşələri, idman qurğuları ilə tam təchiz
edilib. AHİK sədri daha sonra diqqətə çatdırıb ki, artıq həmkarlar
ittifaqlarının sanatoriyalarına, istirahət mərkəzlərinə Rusiyanın müxtəlif bölgələrindən,
Qazaxıstandan, İsraildən insanlar gəlir. Onlar buradakl şəraitdən çox razılıq
edirlər. Biz eyni zamanda həmin turistlər üçün Bakının və rayonlarımızın görməli,
tarixi yerlərinə ekskursiyalar təşkil edirik. Bizə son vaxtlarda müraciət edən xaricilərin sayı xeylu artıb.
Amma biz yay aylarında daha çox öz vətəndaşlarımızın istirahətini təmin etmək
barədə düşünürük. Yəqin ki, sentyabr ayından başlayaraq xarici qonaqlarımızı da
qəbul etməyə başlayacağıq.
