Azərbaycan nümayəndəsi Beynəlxalq Təşkilatın İcraiyyə Komitəsinin tərkibinə seçilib
04 Jun 2019
İyunun 4-də İrlandiyanın Dublin şəhərində “Royal Dublin Society” konsert salonunda Avropa İctimai Xidmətlər Federasiyasının (EPSU) X qurultayının açılış mərasimi keçirilib.
Dörd gün davam edən qurultaya dünyanın müxtəlif ölkələrindən
550 nəfərdən çox nümayəndə və qonaq qatılıb.
Tədbirdə ədalətli gələcəyin qurulması mövzusunda
hazırlanmış proqram müzakirə olunub və müvafiq qərarlar qəbul edilib. Özəlləşməyə
qarşı mübarizə, həmrəyliyin möhkəmləndirilməsi və həmkarlar ittifaqlarının təsir
gücünün artırılması üçün daha sıx əməkdaşlıq məsələləri diqqət mərkəzində olub.
Qurultayı açıq elan edən İrlandiya Respublikasının
Prezidenti Maykl D.Hiqqins həmkarlar ittifaqlarını iqlim dəyişikliyinin, gender
bərabərliyi problemlərinin həllində və iqtisadiyyatın daha ədalətli
formalaşmasında təşəbbüsü öz üzərlərinə götürərək liderlik etməyə çağırıb.
Dublin şəhərinin meri Nayıl Rinq, İrlandiyanın “Forsa” Həmkarlar
İttifaqlarının sədri Kevin Kallinan, Beynəlxalq İctimai Xidmətlər Həmkarlar
İttifaqları Birliyinin prezidenti Roza Pavianellinin də çıxış edərək gündəliyə
çıxarılmış məsələlərə münasibət bildiriblər.
Sonra təşkilati məsələyə baxılıb. Yan Villem Qudrian
yenidən EPSU-nun Baş katibi, Norveçin “Fagforbundet” Həmkarlar İttifaqı
Birliyinin Prezidenti Mette Nord isə EPSU-nun Prezidenti seçiliblər.
Yekunda növbəti 5 il üçün EPSU-ya daxil olan komitələrin
tərkibi formalaşıb və Azərbaycandan Mədəniyyət İşçiləri Həmkarlar İttifaqı
Respublika Komitəsinin sədri Cəmilə Səttarova EPSU-nun İcraiyyə Komitəsinin tərkibinə
seçilib.
Qurultayda Azərbaycan Respublikasından Səhiyyə, Dövlət,
Sahibkarlıq, Kommunal, Su, Metro işçiləri həmkarlar ittifaqlarıın numayəndələri
də iştirak ediblər.
