Azərbaycan Respublikası Prezidentinin Sərəncamı ilə fəxri adlara layiq görülən həmkarlar ittifaqı fəallarının təltif edilməsi mərasimi keçirilib
16 Feb 2018
Prezident İlham Əliyevin müvafiq sərəncamları ilə dövlət təltiflərinə layiq görülən həmkarlar ittifaqları fəallarına fevralın 16-da Azərbaycan Həmkarlar İttifaqları Konfederasiyasında (AHİK) mükafatlar təqdim edilib.
Tədbiri AHİK-in sədri, Beynəlxalq Həmkarlar İttifaqları
Konfederasiyasının və Pan Avropa Regional Şuranın vitse-prezidenti, Milli
Məclisin deputatı Səttar Möhbalıyev açıb. Bildirib ki, Azərbaycan Prezidenti İlham Əliyev insanların
iqtisadi və sosial mənafelərinin, əmək hüquqlarının qorunması sahəsində
həmkarlar ittifaqlarının roluna həmişə böyük önəm verib. Həmkarlar təşkilatları
da dövlətimizin onlara yaratdığı şəraitə adekvat olaraq Prezident İlham
Əliyevin həyata keçirdiyi sosialyönümlü siyasətə layiqli dəstək verir, əmək
kollektivlərində öz işinin gücləndirilməsinə və tərəfdaşlarla səmərəli
əməkdaşlığın dərinləşdirilməsinə diqqəti artırırlar.
Konfederasiya sədri hazırda 1,5 milyona yaxın üzvü
birləşdirən və Azərbaycanda ən böyük ictimai təşkilat olan AHİK-in fəaliyyət
göstərdiyi 25 il ərzində qurumun inkişafında xidmətləri olan şəxslərə
minnətdarlığını bildirib. Qeyd edib ki, belə insanlar arasında ilk yerdə ulu
öndərimiz Heydər Əliyev dayanır. Ulu öndər Heydər Əliyev vətəndaşların qanuni
mənafelərinin, əmək hüquqlarının qorunmasında, sosial problemlərinin həllində
mühüm rol oynayan həmkarlar ittifaqı təşkilatlarının fəaliyyətini həmişə yüksək
qiymətləndirib.
S.Möhbalıyev məlumat verib ki, AHİK-in V qurultayı və
Konfederasiyanın 25 illik yubileyi ərəfəsində Prezident İlham Əliyevin müvafiq
sərəncamları ilə həmkarlar ittifaqları təşkilatlarının 114 üzvü fəxri adlarla
təltif olunub. Onlardan 4 nəfər 3-cü dərəcəli
“Vətənə xidmətə görə” ordeninə, 4 nəfər “Əməkdar Həkim”, 4 nəfər “Əməkdar
Mədəniyyət İşçisi”, 3 nəfər “Əməkdar Müəllim”, 1 nəfər “Əməkdar Bədən Tərbiyəsi
və İdman Xadimi” fəxri adlarına, 98 nəfər isə “Tərəqqi” medalına layiq görülüb.
AHİK sədri deyib ki,
dövlətimizin başçısı Azərbaycan həmkarlar ittifaqları fəallarının təltif
olunması ilə bağlı bundan əvvəl də belə sərəncamlar imzalayıb. Azərbaycan
Prezidenti tərəfindən təltif olunanların sayı ümumilikdə 344-ə çatıb. Onlardan
213-ü ötən hesabat dövrünə aid olub. Bu
yüksək diqqətə görə Prezident İlham Əliyevə AHİK-in üzvləri adından dərin
minnətdarlığını bildirən S.Möhbalıyev Konfederasiyanın bu etimadı layiqincə
doğruldaraq mühüm uğurlar qazandığını və bundan sonra da qazanacağını bildirib.
Sonra dövlət təltiflərinə layiq görülənlərə mükafatlar
təqdim olunub.
Təltif olunanlar adından çıxış edənlər dövlətimizin
diqqət və qayğısını hər zaman hiss etdiklərini bildiriblər, fəxri adlara layiq
görülmələrinin onlar üçün böyük mənəvi dəstək olduğunu deyiblər.
