Azərbaycan Həmkarlar İttifaqları Konfederasiyası IV qurultayının nümayəndələrinin bütün dünya həmkarlar ittifaqlarına Ermənistan-Azərbaycan, Dağlıq Qarabağ münaqişəsi ilə əlaqədar MÜRACİƏTİ

Ermənistanın sovet ordusunun silahlı birləşməsinin köməyi ilə Azərbaycana qarşı başladığı müharibə nəticəsində ölkəmizin ərazisinin 20 faizi işğal olunmuş, bir milyondan artıq azərbaycanlı öz tarixi, doğma torpaqlarından didərgin salınmış, on minlərlə insan vəhşicəsinə öldürülmüş, minlərlə vətəndaşımız itkin düşmüş və girov götürülmüşdür. Xocalıda azərbaycanlı əhaliyə qarşı ermənilərin həyata keçirdiyi genosid dünyanın bir sıra ölkələri tərəfindən tanınmışdır. İşğal olunmuş ərazilərdə şəhər və kəndlərimiz, tarixi abidələrimiz dağıdılmış, minlərlə məktəb, xəstəxana, mədəniyyət ocaqları yandırılmış, xarabaya çevrilmiş, təbii sərvətlərimiz talan edilmiş, Dağlıq Qarabağ və ətraf ərazilərdə zorakı məskunlaşma aparılmışdır. Bu anti-bəşəri proses indi də davam etməkdədir. Münaqişə nəticəsində Azərbaycana 431,5 milyard dollar məbləğində maddi zərər dəymişdir. Uzun illərdən bəri davam edən Ermənistan-Azərbaycan-Dağlıq Qarabağ münaqişəsi ölkəmizin sosial-iqtisadi, mədəni inkişafına ciddi təhdidlər yaratmaqdadır.

Ermənistan rəhbərliyinin yeritdiyi işğalçılıq siyasəti erməni xalqını da acınacaqlı vəziyyətə salıb. Ermənistanda sosial-iqtisadi vəziyyət ildən-ilə ağırlaşır, iqtisadi və maliyyə böhranı son həddə çatmış, miqrasiya prosesi geniş vüsət almışdır.

Bu gün Dağlıq Qarabağ regionu Ermənistan tərəfindən narkotiklərin yetişdirilməsi və onların tranziti üçün istifadə edilir. Bu barədə dəfələrlə beynəlxalq qurumlara, xüsusilə də Birləşmiş Millətlər Təşkilatının Narkotiklər üzrə Baş İdarəsinə konkret məlumatlarla müraciət olunub. Təəssüf ki, beynəlxalq təşkilatlar Ermənistana bu məsələdə təsir göstərməkdə acizdirlər.

Dağlıq Qarabağ Azərbaycanın beynəlxalq səviyyədə tanınmış tarixi hissəsidir. BMT Təhlükəsizlik Şurasının bu problemin həlli ilə bağlı 1993-cü ildə qəbul olunmuş 4 qətnaməsi, ATƏT, Avropa Parlamenti, Avropa Şurasının bir sıra qərar və qətnamələri hələ də icra olunmur. 20 ildən artıqdır ki, ATƏT-in Minsk qrupunun bu istiqamətdə apardığı danışıqlar heç bir nəticə vermir. Ermənistanın işğalı davam etdirməsi təkcə Azərbaycan və region üçün deyil, eyni zamanda bütün dünyada sülhə və təhlükəsizliyə maneədir. Beynəlxalq ictimaiyyət isə hələ də bu ədalətsizliyə dözür.

Biz Azərbaycanın ərazi bütövlüyünün tezliklə bərpa edilməsi, təhlükəsizliyin gücləndirilməsi, regionda qanunsuz silah və narkotik daşımalarının qarşısının alınması, Ermənistanın Azərbaycana qarşı hərbi təcavüzünün aradan qaldıdırılması məqsədi ilə dünya həmkarlar ittifaqlarına müraciət edirik!

Biz Azərbaycan Həmkarlar İttifaqları Konfederasiyasının IV qurultayının nümayəndələri ümumdünya həmkarlar ittifaqları hərəkatını müraciətimizə obyektiv yanaşaraq, haqq və ədaləti müdafiə edərək daha fəal  mövqedən öz sözlərini deməyə səsləyirik!

Azərbaycan öz haqq işi uğrunda mübarizədən bir addım da olsun geri çəkilməyəcək. Dağlıq Qarabağ əzəli və tarixi Azərbaycan torpağı olaraq qalacaq, heç vaxt Ermənistana birləşdirilməyəcəkdir. Biz o torpaqlara qayıtmalıyıq və qayıdacağıq.

Dünyada sülh və ədalətin, demokratiya və sosial rifahın bərqarar olunması uğrunda Azərbaycan Həmkarlar İttifaqları Konfederasiyası hər zaman dünya həmkarlar ittifaqları hərəkatının fəal üzvü kimi qarşılıqlı münasibətlərin qurulması naminə bütün imkan və bacarığını səfərbər etməyə hazırdır.

AHİK-in IV qurultayının

nümayəndələri

Bakı şəhəri

 5 fevral 2013-cü il