S.Möhbalıyev deyib ki, son dövrlər respublikamızda əhəmiyyətli sosial-iqtisadi dəyişikliklər baş verir. Ölkə Prezidenti cənab İlham Əliyevin rəhbərliyi ilə əhalinin rifahının yaxşılaşdırılmasına yönəldilən genişmiqyaslı islahatlar həyata keçirilir. Bazar iqtisadiyyatının təşəkkül tapması, sahibkarlığın inkişafını təmin edən əlverişli mühitin yaradılması istiqamətində atılan önəmli addımlar əhalinin yaşayış səviyyəsinin yüksəlməsi üçün geniş imkanlar açır.

Azərbaycan Həmkarlar İttifaqları Konfederasiyası öz fəaliyyətini beynəlxalq əmək və həmkarlar ittifaqı hərəkatının əsas məqsədi olan muzdlu işçilərin hüquq və mənafelərinin müdafiəsi üzərində qurmuşdur. Biz həmkarlar ittifaqlarının həmrəyliyindən, sosial dialoq təcrübəsindən bəhrələnərək  respublikada dayanıqlı inkişafa töhfələrimizi verir və  sosial-ədalət prinsipinin həyata keçirilməsində  fəal iştirak edirik.

Respublikamız  beynəlxalq ictimaiyyətin, eləcə də BMT-nin qlobal  inkişafla bağlı təşəbbüslərində yaxından iştirak edir.  Son 15 ildə bu sahədə praktiki və innovativ ideyalarla tanışlıq Azərbaycanda Minilliyin İnkişaf Məqsədlərinin (MİM-lər) müvəffəqiyyətlə  həyata keçirilməsini asanlaşdıran mühüm amillərdən olmuşdur.

«Azərbaycan Respublikasının 2016-2020-ci illər üçün Layiqli Əmək üzrə Ölkə Proqramı» Beynəlxalq Əmək Təşkilatı və sosial tərəfdaşlarımızın iştirakı ilə işlənib hazırlanmış və 2016-cı ilin sentyabrında qəbul edilmişdir. Bundan dərhal sonra AHİK-in İcraiyyə Komitəsi «Azərbaycan Respublikasının 2016-2020-ci illər üçün Layiqli Əmək üzrə Ölkə Proqramı»nın həyata keçirilməsinə dair Azərbaycan Həmkarlar İttifaqları Konfederasiyasının Konsepsiyası»nı təsdiq etmişdir. Konsepsiyada həmkarlar ittifaqlarının həyata keçirəcəyi tədbirlər və görəcəyi işlər 8 istiqamət üzrə müəyyənləşdirilmişdir.

Həmin istiqamətlər əsasən bunlardır: məşğulluğun təmin edlilməsi, iqtisadi inkişaf, layiqli əməkhaqqı, sosial müdafiə, sosial partnyorluq, hüquqların müdafiəsi, təhlükəsiz əmək şəraiti, maarifləndirmə, təşkilati işin gücləndirilməsi.

AHİK sədri qeyd edib ki, hələ dayanıqlı inkişaf məqsədləri qəbul edilməmişdən əvvəl də AHİK bu istiqamətdə BƏT ilə birgə xeyli tədbirlər həyata keçirmişdir. 60 seminar və  konfransın 13-ü məhz 8-ci məqsədin mövzularını əhatə etmişdir.

Hamınıza məlumdur ki, Beynəlxalq Əmək Təşkilatı davamlı inkişaf sahəsində səkkizinci məqsədə çatmaq üçün tam və məhsuldar məşğulluq və layiqli işi, cins fərqi qoyulmadan bərabər dəyəri olan əmək üçün bərabər əməkhaqqı ilə təminatı önə çəkir. Eyni zamanda gənclər arasında işsizliyin aradan qaldırılmasını, uşaq əməyindən istifadənin bütün formalarından imtina edilməsini, qeyri-formal iqtisadiyyatın nizamlanmasını, sahibkarlığın stimullaşdırılmasını, kiçik və orta sahibkarlığın inkişafını, əmək hüquqlarının qorunmasını, etibarlı, təhlükəsiz iş şəraitinin yaradılmasını, əmək miqrasiyası məsələlərini əsas prioritet  kimi qeyd edir.

Davamlı inkişafın başqa məqsədlərində də işçilərin layiqli işlə təminatı üzrə ən mühüm məsələlər əks etdirilmişdir. 1-ci və 4-cü məqsədləri buna misal göstərmək olar.

Yuxarıda  sadaladığımız prioritetlərdən biri də qeyri-formal iqtisadiyyatın tənzimlənməsi olduğu üçün qeyri-formal məşğulluğun formal məşğulluğa keçidlə bağlı önəmli addımlardan biri sifarişçi təşkilatların da işəgötürən kimi dəyərləndirilməsi ola bilərdi. Belə ki, bu gün sifarişlə işləyən işçilərin sayı da durmadan artmaqdadır. Onların qeydiyyatı aparılmamaqla yanaşı hüquqlarının qorunması da təmin edilmir. Bu sahədə həm beynəlxalq təşkilatlar, həm də ölkələrin hökumətləri tərəfindən müvafiq tədbirlərin görülməsi vacibdir.

S. Möhbalıyev daha sonra bildirib ki, davamlı inkişaf sahəsində səkkizinci məqsəd barədə danışarkən diqqəti aşağıdakı məsələlərə yönəltməyi vacib hesab edirik.

Əvvəla, davamlı inkişaf sahəsində qlobal miqyasda tədbirlər nəzərdə tutulsa da, hər bir dövlət öz inkişaf səviyyəsinə və imkanlarına uyğun məqsədlər müəyyən edəcəkdər. Hər bir dövlətin nailiyyət qazanması isə bir çox hallarda onların fəaliyyətindən və müəyyən etdikləri siyasətdən asılı olacaqdır. Burada Beynəlxalq Əmək Təşkilatının məsləhətləri balanslaşdırılmış və səmərəli siyasətin işlənib hazırlanmasına kömək edə bilər. Dövlət potensialının gücləndirilməsi və dövlət institutlarının möhkəmləndirilməsi də böyük əhəmiyyət daşıyacaqdır. Bu öz növbəsində əmək bazarının statistik məlumatlarının daha dəqiq toplanması və analizinə kömək edəcəkdir.Hesab edirəm ki, hazırda, beynəlxalq təşkilatların və hökümətlərin özəl sektorla, vətəndaş cəmiyyəti, yerli hakimiyyət orqanları və digər maraqlı tərəflərlə çoxtərəfli əməkdaşlığına da böyük ehtiyac vardır.Layiqli əməyin təmin edilməsində BƏT-in 205-ci Tövsiyyəsinin qəbulu və əməli tətbiqi məqsədlərimizə çatmaq üçün təsirli vasitələrdən biri olardı.

İkinci, önəmli istiqamət qlobal partnyorluğun təmin edilməsidir.Qloballaşma prosesləri, beynəlxalq siyasi-iqtisadi vəziyyət istər-istəməz məqsədlərin həyata keçirilməsinə öz təsirini göstərəcəkdir. Odur ki, məhz BƏT dövlətlər birliklərinin və müxtəlif qlobal idarəetmə qruplarının imkanlarından istifadə etmək, onların bu məsələlərdə ölkələrlə əməkdaşlığına yardımçı olmaq missiyasını öz üzərinə götürməlidir.

Üçüncü istiqamət, tərəfdaşlığın və fəaliyyət birliyin təkmilləşdirilməsidir. Sosial tərəfdaşlarla fəaliyyət istiqamətlərimizi genişləndirmək və dünya təcrübəsindən bəhrələnməliyik. Bu sahədəki beynəlxalq təcrübənin öyrənilməsində BƏT-in yardımına böyük ehtiyacımız var. Hesab edirəm ki, bir sıra dövlətlərin nümayəndələrinin burada iştirak etmələri və öz təcrübələrini bölüşmələri ümumi işimizə əməli töhfə verəcəkdir.