Beynəlxalq Əmək Təşkilatının dəstəyi ilə konfrans keçirilib
07 Jun 2019
İyunun 7-də Bakıda Beynəlxalq Əmək Təşkilatının dəstəyi və AHİK-in təşkilatçılığı ilə «Gənclərin məşğulluğu kollektiv danışıqlar və mübahisələrin həlli» mövzusunda konfrans keçirilib.
İclası giriş sözü ilə AHİK sədrinin birinci müavini
İ.Əliyev açaraq bildirib ki,cəmiyyətimizin ən fəal təbəqəsi sayılan gənclər
müasir cəmiyyətin mühüm hissəsini təşkil edən dinamik qüvvədirlər. Gənclərin məşğulluğunun
təmin edilməsi müxtəlif ölkə və təşkilatların siyasətlərinin üstün istiqamətlərindən
hesab olunur. Dünyada gedən maliyyə böhranının meydana çıxardığı əsas problemlərdən
biri də odur ki, bu gün gənclər arasında işsizlik orta yaşlılar arasında
işsizlikdən 3 dəfə çoxdur.
Müasir şəraitdə gənclərin rastlaşdığı problemlər özünün
müxtəlifliyi ilə seçilir. Yaxşı təhsil almaq və layiqli iş yeri tapmaq imkanını
itirən gənclər daha az müdafiə olunur və adətən, natamam iş vaxtı və
qeyri-adekvat sosial müdafiə sistemi olan az maaşlı, müvəqqəti iş yerlərində
çalışırlar. Gənclər təhsildən əmək fəaliyyətinə keçərkən böyük çətinliklərlə
üzləşirlər. Oxumayan, işləməyən və peşə hazırlığı keçməyən gənclər arasında iş
tapmaq ümidini itirənlərin və ali təhsilli işsiz gənclərin sayının artması
tendensiyası hamımızda narahatlıq doğurur.
Hazırda dünyada gənclərin 35 faizi, yəni 71 milyon gənc
işsizdir.
Bu gün ölkəmiz Gənclərin Məşğulluq Şəbəkəsinə daxil olan
qabaqcıl ölkələr sırasına qoşulub. Bu təşəbbüs BƏT-in texniki yardımı ilə BMT tərəfindən
dəstəklənib. Təhsildən əmək fəaliyyətinə keçmək, gənclərin məşğulluq vəziyyətinin
təhlili üzrə sorğunun nəticələri, eləcə də gənclərin məşğulluğuna təsir üzrə
milli plan Azərbaycanda məşğulluq siyasətinin üstün cəhətləri kimi onlar
arasında işsizliyin azaldılmasını, gənclərin məşğulluq və sahibkarlıq fəaliyyətinə
təsirini, peşə hazırlığı kurslarının təşkilini üstün cəhət kimi önə çəkir. Gənclərlə
bağlı müxtəlif məsələlərin, o cümlədən məşğulluq probleminin həlli üçün ölkədə
(2017-2021) Dövlət Gənclər Proqramı qəbul edilib.
Qəbul edilmiş bu sonuncu Proqramda gənclərin müəssisə və
təşkilatlarda onlar üçün müəyyən edilmiş kvota əsasında işə düzəlmələrinə diqqət
yetirilməsi də öz həllini tapıbdır.
İ.Əliyev daha
sonra deyib ki, Azərbaycan həmkarlar ittifaqları gənc nəslin həyat tərzinin
inkişafı və yaxşılaşdırılması məsələlərini daim diqqət mərkəzində saxlayır. Gənclərin
əmək və sosial-iqtisadi hüquqlarının müdafiəsi, həmkarlar ittifaqı üzvlərinin fəal
həmkarlar ittifaqı işinə cəlb edilməsi və gənclərin təşkilatlanması üçün AHİK-in
Gənclər Şurası fəaliyyət göstərir.
AHİK İcraiyyə Komitəsində 2013-cü ilin mayında «Azərbaycan
gənclərinin məşğulluğu və həmkarlar ittifaqlarının mövqeyi» məsələsi müzakirə
olunub və gənclərin məşğulluğunu təmin etmək üçün həmkarlar ittifaqlarının bütün
imkanlarından istifadə etmək məqsədilə üzv təşkilatların vəzifələri müəyyənləşdirilib.
Məlumdur ki, AHİK Beynəlxalq Əmək Təşkilatı ilə birlikdə
gənclərin məşğulluğu ilə bağlı müxtəlif dövrlərdə birgə layihələr həyata
keçirib – 2014-cü ildə BƏT-lə «Gənclərin məşğulluğu sahəsində həmkarlar
ittifaqlarının rolu» layihə çərçivəsində respublikanın 6 regionunda seminarlar,
Bakı şəhərində isə yekun konfrans keçirilib. Cari ildə gənclərin məşğulluq
problemləri ilə bağlı Beynəlxalq Əmək Təşkilatı ilə yeni bir layihəyə start
verildi. Bu çərçivədə ölkənin Quba, Lənkəran rayonlarında və Gəncə şəhərində hər
birində 30 nəfər dinləyicinin iştirakı ilə «Gənclərin məşğulluğu, kollektiv
danışıqlar və mübahisələrin həlli» mövzusunda seminarlar keçirilib.
İ.Əliyev diqqətə çatdırıb ki, bu günkü konfrans isə keçirilən bu seminarlara yekun
vurmaq və bundan sonra atılacaq addımları müəyyənləşdirməkdir.
AHİK sədrinin birinci müavini vurğulayıb ki, yerlərdə
keçirilən seminarlarda dinləyicilərin böyük əksəriyyəti əmək bazarının təhlil
olunmadan ali məktəblərə qəbulun aparılması və məzunların əksəriyyətinin işlə təmin
oluna bilməməsi, ali məktəbi bitirmiş gənclərin işə qəbulu zamanı iş stacının tələb
edilməsi, regionlarda iş yerlərinin azlığı, vaxtı ilə mövcud olan peşə təhsili
sisteminin dağılması, yenisinin tam formalaşdırılmaması və digər məsələlər
olmuşdur. Hesab edirəm ki, bu məsələlər müvafiq icra orqanları tərəfindən nəzərə
alınmalı və lazımi addımlar atılmalıdır.
Fikrimizcə, biz həmkarlar ittifaqları olaraq aşağıdakı məsələlərin
müvafiq icra orqanları qarşısında qaldırmalı, onların həllinə nail olmağa
çalışmalıyıq:
- texniki-peşə təhsilində islahatların aparılması və əmək
bazarının tələbatına uyğunlaşdırılması;
- əmək şəraitini yaxşılaşdırmaq, iş yerlərinin keyfiyyətini
və gənclərin müdafiə təminatını yüksəltmək;
- peşə ixtisaslarının və biliklərinin inkişaf
strategiyasını işləyib hazırlamaq.
Məlumdur ki, işçi qüvvəsinə qoyulan investisiyalar müasir
texnologiyanın tətbiq edilməsində stimullaşdırmanın ayrılmaz hissəsidir. Buna
görə də gənclər üçün imkanların genişləndirilməsi siyasətinin umdə vəzifələrindən
biri dövlət tərəfindən insan kapitalına investisiyalar qoyulmasının artırılması
olmalıdır.
Daha sonra BƏT-in Azərbaycan üzrə milli koordinatoru
Yaşar Həmzəyev də mövzu ilə bağlı çıxış edib.
Konfransda “Əmək bazarında gənclərin vəziyyəti və həmkarlar
ittifaqlarının mövqeyi”, “Sosial dialoq vasitəsilə kollektiv mübahisələrin həllinin
əhəmiyyəti” “Gənclərin məşğulluğu”, “Gənclərin məşğulluq siyasətinin
formalaşdırılmasında həmkarlar ittifaqlarının rolu”, “Azərbaycan
Respublikasının Əmək Məcəlləsi ilə kollektiv danışıqlar və mübahisələrin həlli
yolları” və s. mövzularda çıxışlar təqdim edilib, iştirakçıların təklifləri
dinlənilib.
