Elektroenergetika İşçiləri Həmkarlar İttifaqı Beynəlxalq Birliyi nümayəndələri arasında işgüzar görüş keçirilib
22 Oct 2019
Oktyabrın 21-25-də Bakıda Elektroenergetika, Elektrotexnika və Yanacaq Sənayesi İşçiləri həmkarlar ittifaqlarının regional komitələri və sahə şuraları sədrlərinin, mərkəzi orqanlarının rəhbərlərinin işgüzar görüşü keçirilib. .
Tədbirdə əsas
müzakirə mövzusu “MDB ölkələrində fəaliyyət göstərən elektroenergetika,
elektrotexnika və yanacaq sənayesində sosial dialoq sistemi (sosial
partnyorluq) və onun təkmilləşdirilməsi yolları” olub.
Qonaqları
salamlayan Elektroenergetika və Elektrotexnika Sənayesi İşçiləri Həmkarlar
İttifaqı Respublika Komitəsinin sədri Rafiq İldarov ölkəmiz və təmsil etdiyi həmkarlar
ittifaqı təşkilatı haqqında iştirakçılara məlumat verib. Bildirib ki, Azərbaycan
Respublikası ikinci dəfə müstəqillik əldə etdikdən sonra Qarabağ münaqişəsi, ərazilərimizin
bir hissəsinin qonşu dövlətin ordusu tərəfindən işğal edilməsi, çoxsaylı
insan tələfatı, bir milyona yaxın qaçqın və məcburi köçkün axını və eləcə də
digər iqtisadi problemlərlə üzləşib. Təəssüflər olsun ki, Qarabağ konflikti hələ
də həll olunmayıb və münaqişə davam etməkdədir.
Bütün bu çətinliklərə
baxmayaraq, son 15-20 ildə Azərbaycan iqtisadiyyatında inkişafa doğru ciddi irəliləyişlər
olub. Azərbaycan BMT-nin Minilliyin İnkişaf Məqsədlərinin reallaşdırılması sahəsində
məqsədyönlü strategiyaya və uğurlu iş təcrübəsinə malikdir. Yoxsulluq səviyyəsinin
azaldılması istiqamətində sosial-iqtisadi tərəqqiyə hesablanan mühüm dövlət
proqramları həyata keçirilir. Azərbaycan neft ölkəsidir. Neft və qaz idxalından
əldə olunan gəlir qeyri-neft sənayesinin inkişafına, ölkənin infrastrukturunun
yaxşılaşıdırılmasına, sosial məsələlərin həllinə sərf olunur. Turizm sektoru
inkişaf etməkdədir. Sənayeyə investisiyaların cəlb olunması məqsədilə əlverişli
iqtisadi mühit yaradılıb. Dövlət siyasətinin əsas istiqamətlərindən biri sosial
sahədə həyata keçirilən uğurlu islahatlardır. Bu il çox ciddi və böyük sosial
paket reallaşdı, pensiyalar, əməkhaqları, müavinətlər artırıldı. Minimum
pensiyanın alıcılıq qabiliyyətinin səviyyəsinə görə Azərbaycan bu gün MDB məkanında
birinci yerdədir. Orta aylıq pensiyanın həcminə görə isə üçüncü yerdədir.
Azərbaycanda həmkarlar
ittifaqı hərəkatının formalaşma tarixi 19-cu əsrin 90-cı illərinə təsadüf edir.
1904-cü ildə ilk dəfə Bakı neftçiləri ilə işəgötürənlər arasında imzalanan
kollektiv müqavilə ilə neft sənayesində həmkarlar ittifaqlarının əsası
qoyulub. Elektroenergetika İşçiləri Həmkarlar İttifaqı 100 ildən çoxdur
ki, fəaliyyət göstərir. Təşkilatımız Azərbaycan Həmkarlar İttifaqları
Konfederasiyasına daxildir, Elektroenergetika İşçiləri Həmkarlar İttifaqı Beynəlxalq
Birliyinin və İndustri ALL Qlobal İttifaqının üzvüdür. Sıralarımıza
elektroenergetika və elektrotexnika sənayesi müəssisə və təşkilatlarının işçiləri
daxildir. Ölkəmizdə əmək münasibətləri sahəsində yaxşı hüquqi baza mövcuddur.
Ölkə qanunvericiliyinə, eləcə də Əmək Məcəlləsinə edilən mütərəqqi dəyişikliklər
həmkarlar ittifaqlarına imkan verir ki, işçilərin hüquqlarını daha effektiv şəkildə
müdafiə etsinlər.
Respublikamızda
sosial partnyorluq çərçivəsində iqtisadi və sosial məsələlər üzrə üçtərəfli
komissiya fəaliyyət göstərir. Məlumdur ki, AHİK-in sədri Səttar
Möhbalıyev həm Beynəlxalq Həmkarlar İttifaqları Konfederasiyasının, eləcə də
Pan Avropa Regional Şurasının vitse-prezidentidir. O həmçinin Azərbaycan Milli
Məclisinin deputatıdır.
R. İldarov
diqqətə çatdırıb ki, işçilərin hüquqlarının müdafiə olunmasına imkan verən əsas
sənəd kollektiv saziş və müqavilələrdir. “Azərenerji” ASC ilə imzalanan
kollektiv müqavilədə müəssisələrin işçiləri üçün bir sıra sosial güzəştlər də əksini
tapıb. Deyib ki, həmkarlar ittifaqı lideri və fəalı iqtisadi, hüquqi, psixoloji
və siyasi sahədə biliklərə malik olmalıdır. Ona görə ki, onlar insanlarla işləyir,
onların problemlərini həll etməyə çalışırlar.
İşgüzar görüşdə
Elektroenergetika İşçiləri Həmkarlar İttifaqı Beynəlxalq Birliyinin sədri
Vasiliy Bondarev və digər nümayəndələr çıxış ediblər.
Tədbirdə AHİK sədrinin müavini Cavanşir Alxasov
da iştirak edib.
