Gənclər həmrəylik gününü birlikdə qeyd etdilər
26 Dec 2019
Dekabrın 26-da Bakı Biznes Mərkəzində Təhsil İşçiləri Azad Həmkarlar İttifaqı Respublika Komitəsinin Dünya Azərbaycanlılarının Həmrəyliyi Günü və Yeni il münasibətilə ali məktəb tələbələri üçün təşkil etdiyi ədəbi gecə keçirilib.
Gecədə Respublika Komitəsinin sədr müavini Mirzə Cəfərzadə
qısa giriş sözü söyləyib. O, AHİK sədri, millət vəkili Səttar Möhbalıyevin
salamlarını və təbriklərini tədbir iştirakçılarına çatdırıb və sonra həmrəylik
gününün tarixi və əhəmiyyəti barədə məlumat verib.
M. Cəfərzadə tələbə-gənclərə həmkarlar ittifaqının
göstərdiyi qayğıdan da söz açıb. Deyib ki, işimizin əsasında tələbələrin mükəmməl
bilik qazanmasına, vətənpərvər vətəndaş kimi formalaşmasına, istirahətinin, əyləncəsinin
təşkilinə və sağlam həyat tərzi yaşamasına yardımçı olmaq missiyası durur. O, tələbə-gəncləri
qarşıdan gələn bayramlar münasibətilə təbrik edib və onlara xoş arzularını
çatdırıb.
20 ali məktəbin 120 tələbəsinin qatıldığı tədbir xoş əhvali-ruhiyyə
ilə başa çatıb. Gecədə Yeni Azərbaycan Partiyasının Gənclər Birliyinin sədri,
partiyanın Siyasi Şurasının üzvü və Rabitə İşçiləri Müstəqil Həmkarlar İttifaqı
Respublika Komitəsinin sədri Seymur Orucov da iştirak edib.
