Gənclərin məşğulluğu məsələləri müzakirə olunub
19 Apr 2019
Azərbaycan Hökuməti ilə Beynəlxalq Əmək Təşkilatı (BƏT) arasında imzalanmış “2016-2020-ci illər üçün Layiqli Əmək üzrə Ölkə Proqramı” çərçivəsində Əmək və Əhalinin Sosial Müdafiəsi Nazirliyi yanında Dövlət Məşğulluq Xidməti orqanlarının əməkdaşları üçün “Dövlət Məşğulluq Xidmətinin potensialının gücləndirilməsi” layihəsi çərçivəsində VI təlim kursuna başlanılıb.
Budəfəki təlim “Gənclərin məşğulluğu, ömürboyu təhsil və
gənclərin əmək bazarına çıxışı” mövzusuna həsr olunub.
Təlim kursunun açılışında çıxış edən əmək və əhalinin
sosial müdafiəsi nazirinin müavini Anar Əliyev deyib ki, bu il 100 illik
yubileyi qeyd olunan BƏT-lə Azərbaycan arasında geniş əməkdaşlıq gündəliyi
mövcuddur. “2016-2020-ci illər üçün Layiqli Əmək üzrə Ölkə Proqramı” da birgə
layihələrin miqyasını xeyli genişləndirib. Proqram çərçivəsində təşkil olunan
bu növbəti təlim kursu gənclərin əmək bazarına çıxışının, məşğulluğunun dəstəklənməsi
sahəsində Dövlət Məşğulluq Xidmətinin əməkdaşlarının bilik və peşəkarlıq səviyyələrinin
artırılmasına, onların bu sahədə dünyada olan qabaqcıl təcrübələri öyrənmələrinə
dəyərli töhfədir.
Azərbaycan Həmkarlar İttifaqları Konfederasiyası sədrinin
müavini Cavanşir Alxasov həmkarlar ittifaqının gənclər siyasətinin əsas hədəfləri
və bu hədəflərə nail olmaq üçün həyata keçirdiyi tədbirləri diqqətə çatdırıb.
Deyib ki, həmkarlar ittifaqı üzvlərinin təxminən 1/4-i 30 yaşına qədər gənclərdir.
İşləmək qabiliyyətinə malik oğlan və qızların əmək bazarında rəqabətə tab gətirmələri
üçün real addımlar atılır. Müntəzəm tədqiqatlar aparılır, problemlər müəyyənləşdirilir.
C.Alxasov deyib ki, tərəfdaşlarımızla bağladığımız Baş
Kollektiv Sazişdə də gənclərin məşğulluğu, əmək hüquqları geniş yer alıb. Bu sənəddə
gənclərin məşğulluq imkanlarını artırmağa, ordudan tərxis edilmiş gənclərin əvvəlki
iş yerlərinə və vəzifələrinə bərpa olunmasına nəzarəti gücləndirmək, dövlət
uşaq müəssisələrində yaşayan valideyn himayəsindən məhrum uşaqların da təhsil
almasına və iş yeri ilə təminatına köməklik göstərmək və digər məsələlər nəzərdə
tutulub. AHİK-in İcraiyyə Komitəsində “Azərbaycan gənclərinin məşğulluğu və həmkarlar
ittifaqlarının mövqeyi” məsələsi müzakirə olunub və üzv təşkilatlar qarşısında
bu istiqamətdə vəzifələr müəyyənləşdirilib.
Sahibkarlar Konfederasiyasının Baş katibinin müavini Fuad
Hümbətov, BƏT-in “MDB-də Gənclərin Məşğulluğu üçün Tərəfdaşlıq” layihəsinin rəhbəri
Ramiro Pizarro çıxış edərək, hazırkı təlim kursunun əhəmiyyətini vurğulayıblar.
Təlim kursu dörd gün davam edib.
