Günün aktual məsələləri müzakirəyə çıxarılıb
06 Jul 2018
İyulun 6-da “Xidmət-İş” Həmkarlar İttifaqları Federasiyasının Əməyin Mühafizəsi üzrə Komissiyasının növbəti iclası olub. Federasiyanın I vitse-prezidenti Sadət Tahirova gündəlikdə duran məsələləri təqdim edib.
O, əvvəlcə baş nazir Novruz Məmmədovun, bir neçə gün
davam etməsi gözlənilən, anomal istilərlə əlaqədar imzaladığı sərəncamı diqqətə
çatdırıb. Bu sərəncamdan
irəli gələn tapşırıqların icrasının həmkarlar ittifaqları tərəfindən diqqətdə
saxlanılmasının vacibliyini vurğulayıb. Deyib ki, ilk təşkilatlar
işçilərə qanunvericilik çərçivəsində yaradılan iş şəraitini, onlara müəyyən
olunan vaxtlarda qısamüddətli istirahətin verilib-verilmədiyini və sairə tələblərin
yerinə yetirilməsini nəzarətdə saxlamalıdırlar. Bu barədə Federasiya müntəzəm məlumatlandırılmalıdır.
Federasiyanın baş texniki əmək müfəttişi Rüfət Məmmədov
“Sağlam və təhlükəsiz əmək şəraitinin yaradılması üzrə 2018-ci ilin ən yaxşı müəssisəsi
(təşkilatı)” Respublika müsabiqəsinin gedişi barədə iclas iştirakçılarını məlumatlandırıb.
Deyib ki, müsabiqəyə
qoşulmuş müəssisələrdə əməyin təhlükəsizliyi ilə bağlı vəziyyət, bu istiqamətdə
həyata keçirilən tədbirlər Federasiyanın rayon, şəhər komitələrinin, ilk təşkilatların
müvafiq işçiləri tərəfindən yoxlanılır. Lazımi metodiki və təşkilati köməkliklər
göstərilir.
Rüfət müəllim müsabiqənin məqsədlərindən də danışıb. Əsas məqsədimiz işəgötürənləri
işçilər üçün sağlam və təhlükəsiz əmək şəraiti yaratmağa stimullaşdırmaq, əməyin
mühafizəsi üzrə komissiyaların və ictimai müvəkkillərin işini canlandırmaqdan
ibarətdir.
Federasiyanın xidmətinə daxil olan sağlamlıq ocaqlarında
yerləşən binalarda, hovuzlarda, idman qurğularında təhlükəsizlik qaydalarının tətbiqi
istiqamətində görülən işlər nə səviyyədədir?
Bu suala “Kurort” Səhmdar Cəmiyyətinin aparıcı mütəxəssisi
Xanımnənə Abdullayeva aydınlıq gətirib. Respublika Dezinfeksiya Mərkəzinin əməkdaşları, bağlanmış
müqaviləyə əsasən, “Xəzər” Turist Bazasında dezinfeksiya və deratizasiya işləri
aparıblar. Bazanın işçiləri təhlükəsiz əmək qaydaları ilə təlimatlandırılıblar. “Abşeron”, “Günəşli”,
“Qaranquş”, “Naftalan” sanatoriyaları və “Şəki” İstirahət Evinin binaları
yanğın əleyhinə avadanlıqla təmin edilib.
“Bilgəh” Kardioloji Sanatoriyasının çimərliyində Fövqəladə
Hallar Nazirliyinin və Bakı Şəhəri Təcili Tibbi Yardım Stansiyasının dəstələri
gün ərzində növbə çəkir.
İclasda digər məsələlərə də baxılıb. Müzakirələrdə Federasiyanın
Sumqayıt şəhər, paytaxtın Səbail, Binəqədi rayon komitələrinin sədrləri iştirak
ediblər.
