İstanbulda Azərbaycan Həmkarlar İttifaqları Konfederasiyasının İcraiyyə Komitəsinin iclası keçirilib
21 Aug 2019
Avqustun 21-də İstanbulda Azərbaycan Həmkarlar İttifaqları Konfederasiyasının İcraiyyə Komitəsinin iclası keçirilib.
Tədbiri giriş sözü ilə AHİK sədri, Milli Məclisin
deputatı Səttar Möhbalıyev açıb, gündəlikdə duran məsələlər barədə məlumat
verib.
Əvvəlcə AHİK-in İcraiyyə Komitəsinin və Aparatının
2019-cu il üçün iş planı, Baş Kollektiv Sazişin layihəsini hazırlayan işçi
qrupunun siyahısı təsdiq olunub.
Sonra AHİK-in 24 oktyabr 2013-cü il tarixli “Azərbaycan Həmkarlar
İttifaqları Konfederasiyasının Azərbaycan Respublikası Müharibə, Əmək, Silahlı
Qüvvələr və Hüquq-Mühafizə Orqanları Veteranları Təşkilatı ilə fəaliyyət planı
haqqında” arayış təqdim edilib. Arayışda qeyd edilib ki, AHİK-in məclis və
iclaslarında bir çox aktual problemlərlə yanaşı, veteranların sosial müdafiəsi
məsələsi, veteran şuralarının əsas aparıcı qüvvəsi olan daimi komissiyaların fəaliyyətinin
canlanması üçün şəraitin yaradılması müzakirə olunur, həmkarlar ittifaqı işçilərinə
“Əmək veteranı” adı və vəsiqəsi verilir. AHİK Milli Məclisdə veteranların
problemlərinin həlli ilə bağlı qanun yaradıcılığı prosesində iştirak edir.
Qanunlara dəyişiklik və əlavələr edilməsinə nail olmaqla onları günün tələblərinə
uyğunlaşdırır.
AHİK-in üzv və tabeliyindəki bütün təşkilatlardan daxil
olan hesabatlara əsasən məlum olur ki, onlar Azərbaycan Respublikasının
“Veteranlar haqqında”, “Sosial xidmət haqqında”, “Müharibə, silahlı qüvvələr və
əmək veteranı adlarının verilməsi qaydası və şərtləri haqqında” və digər bunun
kimi qanun və normativ aktlardan irəli gələn vəzifələrin yerinə yetirilməsinə,
tədbirlər planlarının qəbul edilib həyata keçirilməsinə məsuliyyətlə
yanaşırlar.
İl ərzində veteran və veteran ailələri nümayəndələrindən
müraciətlər daxil olur. Onlara problemlərinin həllində mümkün köməklik göstərirlər.
Veteranların sosial və hüquqi müdafiəsinin təmin edilməsi, mənzil və maddi-məişət
şəraitinin yaxşılaşdırılması üzrə ardıcıl işlər aparılır. Bu istiqamətlərdə fəaliyyət
Əmək və Əhalinin Sosial Müdafiəsi Nazirliyi, şəhər və rayon icra hakimiyyətləri,
bələdiyyə orqanları və digər dövlət və qeyri-hökumət təşkilatları ilə
qarşılıqlı əlaqədə həyata keçirilir.
Arayışda bildirilir ki, həmkarlar ittifaqı təşkilatları
işləyən və qeydiyyatda olan bütün veteranlara və onların ailə üzvlərinə qayğı
ilə yanaşaraq sahə tarif sazişlərinə, idarə və müəssisələrin bağladığı
kollektiv müqavilələrə müharibə iştirakçılarına, həlak olmuş hərbi
qulluqçuların ailələrinə, əlillərə, pensiyaçılara, əmək və müharibə
veteranlarına müxtəlif növ sosial yardımlar göstərilməsi bəndlərini daxil
etmiş, müharibə və əmək veteranları, müharibə əlilləri üçün əlavə güzəşt və təminatlara
nail olmuşdur.
Daha sonra “2018-ci ildə işçilər üçün sağlam və təhlükəsiz
əmək şəraitinin yaradılması və istehsalat xəsarətlərinin qarşısının alınması
üzrə AHİK-in üzv təşkilatlarında həyata keçirilən işlər barədə” məlumat dinlənildi.
Məlumatda bildirildi ki, 2018-ci hesabat ilində Azərbaycan həmkarlar
ittifaqlarının xidmətinə daxil olan müəssisə və təşkilatlarda təhlükəsiz və
sağlam əmək şəraitinin təmin edilməsi, əməyin və ətraf mühitin mühafizəsi,
istehsalatda bədbəxt hadisələrin və peşə xəstəliklərinin qarşısının alınması, əməyin
mühafizəsi və təhlükəsizlik texnikası üzrə qayda və normalara riayət olunması
sahəsində müəyyən işlər görülmüşdür.
Beynəlxalq Əmək Təşkilatının (BƏT) 155 nömrəli “Əməyin təhlükəsizliyi
və sağlamlıq haqqında” Konvensiyası Sosial-İqtisadi Məsələlər üzrə Üçtərəfli
Komissiyanın iclasında müzakirə olunaraq ratifikasiyaya hazırlanmışdır. Həmkarlar
ittifaqı komitələri, əməyin mühafizəsi üzrə komissiyalar və ictimai müvəkkillər
üçün metodik vəsait işlənilmişdir.
“Ümumdünya Əməyin Mühafizəsi Günü” (28 Aprel) və “Ümumdünya
Layiqli Əmək Günü” (7 Oktyabr) münasibətilə “Əməyin mühafizəsi və əmək
sferasının gələcəyi” devizi altında təşkil olunmuş seminarların işinə əksər şəhər
və rayonun müəssisə, idarə və təşkilatlarının 2850 nəfərdən çox həmkarlar
ittifaqı üzvü və ictimai müvəkkilləri ilə yanaşı, gənc işçilər də cəlb edilmişlər.
Tədbirlərdə müxtəlif təhlükəsizlik və əmək
qanunvericiliyinin tələblərinə aid hazırlanmış xüsusi anket-sorğuda gənc işçilərin
iş yerlərində qarşılaşdıqları problemlərə dair sorğular öz əksini tapmışdır.
Seminarlarda iştirak edən respondentlərin məlumatları təhlil edilmiş, müvafiq
addımlar atılmışdır.
Həmkarlar ittifaqı fəallarının, əməyin mühafizəsi
komissiyalarının və ictimai əsaslarla əmək müvəkkillərinin iştirakı ilə
yoxlamalar aparılmışdır. Nəticədə 630 işçi standartların tələblərinə uyğun
xüsusi geyimlə təmin edilmişdir. Sanitar-məişət otaqları, fərdi və kollektiv
mühafizə vasitələri, avadanlıq və qurğuların texniki vəziyyətinin norma və
qaydalara uyğunlaşdırılması, işçilərin təlimatlandırılması və biliklərinin
yoxlanması üçün təlimat və proqramların hazırlanması sahəsində müşahidə edilən
nöqsanlar aradan qaldırılmışdır.
Təqdim olunan arayış və məlumat ətrafında müzakirələr
aparıldı. Müvafiq qərarlar qəbul olundu.
AHİK sədri yekun sözü söylədi, sözügedən sahələrdə fəaliyyəti
daha da gücləndirmək məqsədilə tövsiyələrini verdi.
