Kollektiv müqavilələrin icrasına mütəmadi olaraq nəzarət edilir
10 Apr 2019
Aprelin 10-da Sahibkarlıq, Özəl Elm və Yüngül Sənaye İşçiləri Həmkarlar İttifaqı (SÖEYSİ Hİ) Respublika Komitəsi Gəncə şəhərində “Əməyin mühafizəsi və əmək sferasının gələcəyi” mövzusunda zona seminarı keçirib.
Ümumdünya Əməyin Mühafizəsi Gününə (28 Aprel) həsr
olunmuş tədbirdə sahə Hİ-nin ətraf rayonlarda fəaliyyət göstərən komitələrinin
sədrləri və fəalları da iştirak ediblər.
Seminarı SÖEYSİ Hİ Gəncə Şəhər Komitəsinin sədri
Gülnarə Verdiyeva açaraq Komitənin xidmət dairəsində olan müəssisələrdə işçilərin
sağlamlığı istiqamətində görülən işlərdən danışıb. Deyib ki, ki, əməyin mühafizəsinə
dair öhdəliklər müəssisələrin rəhbərləri ilə bağlanan kollektiv müqavilələrdə
mühüm yer tutur.
Sahə Hİ Respublika Komitəsinin əməyin baş texniki müfəttişi
Əliş İbrahimov tədbirdə geniş məruzə ilə çıxış edib. Bu əlamətdar günün yaranma səbəbləri və
tarixi barədə məlumat verərək bildirib ki, aprelin 28-i dünyanın 100-dən çox
ölkəsində, o cümlədən Azərbaycanda müxtəlif formatlı tədbirlərlə qeyd olunur. Bildiyiniz
kimi, əməyin mühafizəsi dövlətimizin iqtisadi siyasətinin tərkib hissəsidir. Təsərrüfatlarda
baş vermiş istehsalat zədələnmələrinin qarşısının alınması, təhlükəli, zərərli
iş sahələrinin ləğvi istiqamətində dövlət səviyyəsində ciddi işlər görülür. İşçilərin
təhlükəsiz iş yeri ilə təminatı həmkarlar ittifaqının da maraq dairəsindədir.
AHİK sədri, millət vəkili Səttar Möhbalıyevin təşəbbüsü və təklifləri ilə Əmək
Məcəlləsində, digər normativ-hüquqi sənədlərdə əməyin mühafizəsi ilə bağlı maddələrdə
iş şəraitinin daha təkmil qorunmasına səbəb ola biləcək dəyişikliklər edilib.
Üzv təşkilatlarımızın tərəfdaşları ilə bağladıqları kollektiv müqavilələrdə əməyin
mühafizəsi konkret və ətraflı maddələrlə əksini tapıb. Yaxşı haldır ki, həmkarlar
ittifaqı komitələri kollektiv müqavilələr imzalamaqla vəzifəsini bitmiş hesab
etmir, onun icrasını mütəmadi nəzarətdə saxlayır.
Ə.İbrahimov maarifləndirmə işinin, tərəfdaşlarla sosial dialoqun
da təhlükəsiz iş şəraitinə nail olmaq təşəbbüsünün reallaşmasında böyük əhəmiyyət
daşıdığını diqqətə çatdırıb.
Seminarda məruzə ətrafında müzakirələr aparılıb və
iştirakçıların sualları cavablandırılıb.
