Qurultayda qoyulan məsələlərə baxıldı
05 Nov 2019
Noyabrın 5-6-da Belçikanın paytaxtı Brüssel şəhərində Avropa İctimai Xidmətlər Həmkarlar İttifaqı Birliyinin (EPSU) İcraiyyə Komitəsinin 63-cü iclası keçirilmişdir.
Tədbirdə Birliyin Baş katibi Yan Villem Qudrian hesabat məruzəsi
ilə çıxış etmişdir. O, təşkilatın bu il keçirilmiş sonuncu qurultayında müəyyənləşdirilmiş
vəzifələrin yerinə yetirilməsinə diqqət çəkmiş, üzv təşkilatlarda baş verən dəyişikliklərin
statistikasını təqdim etmişdir. Ayrı-ayrı fəaliyyət istiqamətləri üzrə görülən
işlərdən danışmışdır.
İclasda qonaq qismində iştirak edən Avropa Həmkarlar
İttifaqları Konfederasiyasının Baş katibi Luka Visentini çıxışında demişdir ki,
EPSU bizim təşkilatın tərkib hissəsi olmaqla qitədə gedən iqtisadi, sosial
proseslərdə fəal iştirak edir. Təsadüfi deyil ki, hər iki qurumun müzakirəyə
çıxardığı məsələlər, o cümlədən problemlər həmişə Avropa Komissiyasının maraq
dairəsində olur.
Sonra gündəmdə olan “Rəqəmsallaşdırma” mövzusunun ətrafında
müxtəlif ölkə nümayəndələrinin fikirləri səsləndirilib.
Müzakirələrdə EPSU-nun İcraiyyə Komitəsinin üzvü, Azərbaycan
Mədəniyyət İşçiləri Həmkarlar İttifaqı Respublika Komitəsinin sədri Cəmilə Səttarova,
EPSU-nun Daimi Komitəsinin üzvü, Sahibkarlıq, Özəl Elm və Yüngül Sənaye İşçiləri
Həmkarlar İttifaqı Respublika Komitəsinin sədri Məhəmmədəli Salmanov da fəal
iştirak ediblər.
