Səttar Möhbalıyev AHİK-in sanatoriya-kurort müəssisələrindəki şəraitlə tanış olub
06 Aug 2018
Avqustun 6-da Azərbaycan Həmkarlar İttifaqları Konfederasiyasının sədri, Milli Məclisin deputatı Səttar Möhbalıyev AHİK-in sanatoriya-kurort müəssisələrində olub. AHİK sədri sanatoriyalardakı şəraitlə tanış olub və orada müalicə olunan vətəndaşlarla görüşüb.
Bilgəh Kardioloji Sanatoriyasındakı vəziyyətlə tanış olan
Səttar Möhbalıyev burada müalicə olunan vətəndaşlara göstərilən xidmətin səviyyəsi
ilə maraqlanıb. O qeyd edib ki, Prezident İlham Əliyevin tapşırığı ilə
kurortların inkişafına dair dövlət proqramı hazırlanıb. Dövlət Proqramı ilə əlaqədar
AHİK sanatoriyaların tikintisi və təmiri işlərini aparır. AHİK sədri bildirib
ki, bu gün sanatoriya və istirahət mərkəzlərinin 85 faizi konfederasiyanın
balansındadır. Sanatoriyaların əksəriyyətinin 1988-ci ildən başlayaraq yararsız
vəziyyətə düşdüyünü deyən S.Möhbalıyev vurğulayıb ki, onların bəzilərində
qaçqın və məcburi köçkünlər məskunlaşıbdır. Əksər sanatoriya və istirahət mərkəzlərində
təmir-tikinti işi aparılıb, bəziləri isə tamamilə yenilənib. Sanatoriyalar
bütün zəruri avadanlıqlarla, o cümlədə müasir tibbi avadanlıqlarla, idman qurğuları ilə, istirahət guşələri ilə
tam təchiz edilib.
Vətəndaşlarla söhbətində 1990-cı illərin əvvəllərində Azərbaycan
iqtisadiyyatının tənəzzülə uğradığını xatırladan deputat həmin dövrlərdə AHİK-də
maliyyə vəziyyətinin yaxşı olmadığını bildirib. Səttar Möhbalıyev əlavə edib
ki, ümummilli lider Heydər Əliyev yenidən hakimiyyətə gəldikdən sonra ölkənin
iqtisadiyyatı dirçəldi. AHİK-in də maliyyə imkanları yaxşılaşdı. S.Möhbalıyev
deyib ki, konfederasiya maliyyə vəsaitindən səmərəli istifadə edir. Sahə həmkarlar
ittifaqlarına tapşırılıb ki, balabslarında olan sanatoriya və istirahət mərkəzlərində
təmir-tikinti işlərini mütəmadi həyata keçirsinlər. Bundan başqa, əldə olunan vəsaitdən
ehtiyat fondu yaradılıb. Bunun nəticəsində dəmiryolu, rabitə, təhsil işçilərinin
və digər dövlət qurumlarının həmkarlar ittifaqları Nabranda müasir standartlara
uyğun istirahət mərkəzləri tikiblər. Mədəniyyət işçiləri Həmkarlar İttifaqı da
hal-hazırda öz üzvləri üçün istirahət mərkəzinin tikintsini
yekunlaşdırmaqdadır.
AHİK sədri həmçinin bildirib ki, konfederasiya tərəfindən
“Kurort” Səhmdar Cəmiyyətinə maliyyə vəsaiti yönəldilir. Bu qurum müalicə
sanatoriyalarının müasirləşdirilməsində mütəmadi işlər aparır. Hazırda Həmkarlar
ittifaqının xətti ilə Naftalan şəhərində 200-220 nəfərlik yeni sanatoriya
tikilir
Sahə həmkarlar
ittifaqları 30-35 min nəfərədək həmkarlar ittifaqı üzvünün sanatoriyalarda müalicə və istirahətlərini təmin
edirlər.
Səttar Möhbalıyev məlumat verib ki, Dövlət Neft Şirkəti
öz əməkdaşlarının müxtəlif sanatoriya və istirahət mərkəzlərinə göndərilməsi
üçün AHİK-ə ildə 5 milyon manat vəsait ayırır. Bu vəsait hesabına sanatoriyalar
yeni və müasir tibbi avadanlıqlarla təmin edilib. Uşaqların da istirahəti diqqət mərkəzindədir. 5
min məktəblinin istirahəti AHİK tərəfindən təmin olunub. 15 min uşaq isə ailəsi
ilə birlikdə istirahətə göndərilib.
Müalicə sanatoriyalarındakı və istirahət mərkəzlərindəki
qiymətlərə gəlincə isə AHİK sədri bildirib ki, orta qiymət 600 manatdır. Qiymət
artımı edilməməsinin səbəbini S.Möhbalıyev istirahət edənlərin sayında azalma
riskinin ola biləcəyi ilə izah edib. O, həmçinin 20 mindən çox şəhid ailəsinə,
Qarabağ müharibəsi əlilinə və aztəminatlı insanlara AHİK tərəfindən yardım göstərildiyini
deyib.
Daha sonra Səttar Möhbalıyev Mərdəkan qəsəbəsindəki “Günəşli”
nevroloji, “Abşeron” mədə-bağırsaq müalicəsi, “Qaranquş” uroloji, həmçinin Şıx
qəsəbəsindəki dayaq və hərəkət sistemlərinin müalicəsi sanatoriyalarında olub. Bu
sanatoriyalarda istirahət edən və müalicə alan vətəndaşların tibbi
prosedurları, şəraiti ilə tanış olub. O, sanatoriyaların ərazisində yeni tikilən
korpuslara baxıb, yeni istifadəyə verilmiş tibbi avandanlıqlardan istifadə
prosesi ilə maraqlanıb,
həmçinin müalicə olunan vətəndaşların ərzaq və qida təminatı
ilə tanış olub.
