Suraxanıda şəhid tankçının xatirəsi anılıb
24 Oct 2018
Oktyabrın 24-də Suraxanı rayonu Heydər Əliyev Mərkəzində torpaqlarımızın azadlığı uğrunda gedən döyüşlərdə şəhid olmuş “Azərbaycan Bayrağı” Ordenli Əhməd Möhbalıyevin xatirəsinə həsr olunmuş tədbir keçirilib.
Tədbir iştirakçıları əvvəlcə rayondakı Heydər Əliyev
parkında ulu öndərin abidəsini ziyarət edib, Suraxanı rayonu Heydər Əliyev Mərkəzi
ilə tanış olublar.
Tədbirin əvvəlində Əhməd Möhbalıyevin və torpaqlarımızın
azadlığı uğrunda şəhid olmuş oğul və qızlarımızın xatirəsi bir dəqiqəlik
sükutla yad edilib.
Suraxanı Rayon İcra Hakimiyyəti başçısı aparatının
ictimai-siyasi və humanitar məsələlər şöbəsinin müdiri Barxudar Barxudarov
çıxış edərək deyib ki, keçmiş sovet ordusunda hərbçi olan Möhbalıyev Əhməd
Suliddin oğlu 1992-ci ilin aprel ayında Vətənin dar günündə doğma Azərbaycana
qayıdaraq yenicə formalaşmaqda olan milli ordu sıralarında zabit kimi cəbhə xəttində
yerləşən tank taborunda xidmətə başlayıb, Şuşa, Laçın, Qubadlı, Tərtər, Ağdam
rayonları uğrunda gedən döyüşlərdə qəhrəmanlıq nümunələri göstərib. Döyüşlərdə
3 dəfə ağır yaralansa da, sağalan kimi yenidən cəbhəyə qayıdıb və 1993-cü il
iyunun 25-də Ağdam rayonunun Qızılı-Kəngərli kəndi uğrunda gedən döyüşlərdə qəhrəmancasına
şəhid olub. Azərbaycan Respublikası Prezidentinin 1994-cü il 25 iyun tarixli Fərmanı
ilə “Azərbaycan Bayrağı” ordeni ilə (ölümündən sonra) təltif olunub.
Vurğulanıb ki, Prezident İlham Əliyev torpaqlarımızın
azadlığı uğrunda şəhid olanlara, onların ailələrinə, müharibə əlillərinə və iştirakçılarına
xüsusi diqqət və qayğı göstərir. Suraxanı rayonunun Qaraçuxur qəsəbəsində Əhməd
Möhbalıyevin adına küçə var. Rayonda həyata keçirilməsi nəzərdə tutulmuş yerli
proqramlardan biri də şəhid xatirə komplekslərinin əsaslı təmiri və yenilərinin
tikintisidir. Həmin proqrama əsasən, ötən dövrdə 19 ünvanda 63 şəhidin xatirəsini
ədəbiləşdirən xatirə kompleksləri əsaslı təmir olunub və yeniləri tikilib.
Şuşa Rayon İcra Hakimiyyətinin başçısı, “Azərbaycan
Respublikası Dağlıq Qarabağ Bölgəsinin Azərbaycanlı İcması” İctimai Birliyinin
sədri Bayram Səfərov qeyd edib ki, zaman-zaman Azərbaycan xalqına qarşı
soyqırımı siyasəti yürüdən ermənilər yenicə müstəqillik qazanmış ölkəmizə
silahlı basqın ediblər, Qarabağ və onun ətraf rayonları dünya ictimaiyyətinin
gözü qarşısında işğal olunub, minlərlə soydaşımız vəhşicəsinə qətlə yetirilib,
öz doğma yurdlarından qovulub, amansız işgəncələrə məruz qalıb. Azərbaycanın
oğul və qızları belə bir çətin siyasi, iqtisadi böhran şəraitində Vətənin
müdafiəsinə qalxaraq erməni silahlı birləşmələri ilə qeyri-bərabər döyüşə girərək
ölüm-dirim mübarizəsində göstərdikləri misilsiz qəhrəmanlıqlarla adlarını
tarixin yaddaşına yazıblar. Belə döyüşçülərdən biri də Əhməd Möhbalıyev olub.
Əhməd Möhbalıyevin həyat yolu hər bir gənc üçün örnəkdir. Onun əziz xatirəsi həmişə
Azərbaycanı sevən insanların qəlbində yaşayacaq.
Bakı Dağ Yəhudiləri Dini İcmasının sədri Milix Yevdayev,
tədqiqatçı jurnalist Lalə Hüseynova, Səbail tank taburunun sabiq komandiri Hacı
Əzimov, “Dədə Qordud” Milli Fondunun prezidenti Eldar İsmayılov, Əhməd
Möhbalıyevin cəbhə yoldaşları çıxış edərək deyiblər ki, bu gün Azərbaycanın
Silahlı Qüvvələri dünyada ən güclü 50 ordu sırasında yer alır. 2016-cı il aprel
ayının əvvəlində cəbhə xəttində Ermənistanın növbəti hərbi təxribatı ilə üzləşən
ordumuz əks-hücuma keçərək işğalçılara güclü zərbələr endirib və qısa müddətdə
iki min hektar ərazini düşməndən azad edib. 2018-ci ilin may ayında isə
Naxçıvan Muxtar Respublikasının 11 min hektardan çox ərazisi düşməndən azad
edilib, Yerevan-Gorus-Laçın yolu nəzarətə götürülüb. Çıxış edənlər Əhməd
Möhbalıyevin qəhrəmanlığından danışaraq onun əziz xatirəsinin hər bir insanın qəlbində
yaşayacağını, qəhrəmanlığının bütün gənclər üçün örnək olduğunu vurğulayıblar.
Əhməd Möhbalıyevin qardaşı Xaliq Möhbalıyev Vətənin azadlığı uğrunda şəhid
olanlara, onların ailələrinə, müharibə əlillərinə və iştirakçılarına göstərilən
diqqət və qayğıya görə Prezident İlham Əliyevə ailələri adından minnətdarlığını
bildirib.
Tədbirdə Ə. Möhbalıyevə həsr olunmuş mahnının lent yazısı
səsləndirilib.
Sonda
gənclərin vətənpərvərlik tərbiyəsində, həmçinin bu tədbirin təşkilində fəallıq
göstərən bir neçə nəfərə AHİK-in diplomları verilib. “Dədə Qorqud” Milli
Fondunun isə Əhməd Möhbalıyevə “Həzi Aslanov” ordeni (ölümündən sonra), onun
həyat yoldaşına “Mehriban ana” ordeni təqdim edilib.
