Vətən müharibəsini şərəfləndirən Zəfər paradı
12 Dec 2020
Ermənistanın növbəti hərbi təxribatına cavab olaraq başlanan Vətən müharibəsi Dağlıq Qarabağ da daxil olmaqla, işğal altındakı ərazilərimizin qaytarılması ilə nəticələndi.
44 gün davam edən
bu savaş tariximizin parlaq səhifəsi olmaqla, Azərbaycan xalqının iftixar və
qürur mənbəyinə çevrildi. Ötən 17 ildə möhtəşəm uğurlara imza atan,
respublikamızı yüksəldən İlham Əliyev Azərbaycanın yeganə ağrılı probleminə də
son qoydu.
Çoxdan gözlədiyimiz
tarix
Azərbaycan xalqı
işğaldakı torpaqlarımızın azad ediləcəyi günü çoxdan gözləyirdi. Ulu Öndər Heydər
Əliyevin müəyyənləşdirdiyi və möhtərəm İlham Əliyevin davam etdirdiyi bu siyasətin
nəticəsində günlərin birində torpaqlarımızın azad ediləcəynə hər bir azərbaycanlı
əmin idi. Artıq torpaqlarımız azaddır və dekabrın 10-da Bakı şəhərinin Azadlıq
meydanında keçirilən ordumuzun Zəfər paradı şanlı qələbəmizi bütün dünyaya bəyan
etdi.
Bu qələbə kimi
paradı da xalqımız çoxdan gözləyirdi. Azadlıq meydanında indiyə kimi, neçə dəfə
hərbi parad keçirilib. Son hərbi parad Bakının işğaldan azad edilməsinin 100
illiyinə həsr olunmuşdu. Həmin paradlar göstərmişdi ki, Azərbaycan Cənubi
Qafqazın ən qüdrətli ordusuna malikdir və qoşunlarımız döyüş hazırlığına görə
MDB məkanında ön sıralarda gedir. Azərbaycan vətəndaşları Silahlı Qüvvələrimizdə
baş verən keyfiyyət və kəmiyyət dəyişikliklərini ordumuzun keçirdiyi təntənəli
hərbi paradlarda görmüşdülər. Ölkəmizin hərbi qüdrətinin nümayişi olan belə
paradlarda beynəlxalq ictimaiyyət də Azərbaycanın mükəmməl hərbi gücə malik
olduğuna şahidlik etmişdi. Təsdiq olunmuşdu ki, Azərbaycan Ordusu arsenalını ən
modern silah və digər hərbi texnika ilə zənginləşdirir və dünyanın hərbi
baxımdan inkişaf etmiş dövlətlərinin malik olduqları strateji silahlar Azərbaycanda
var.
Bu paradları izləyərkən
hər birimizin ürəyindən bir arzu da keçirdi. Günlərin birində həmin Azadlıq
meydanında Zəfər paradının keçirilməsini arzulamışdıq. Bu istəyimizin nə vaxtsa
mütləq reallaşacağına inanmışdıq. Ona görə bu gün hər bir azərbaycanlı özünü
dünyanın ən xoşbəxt xalqının nümayəndəsi sayır, hər birimiz sevincliyik. Çünki
torpaqlarımızın azad edilməsi ilə böyük arzumuz, ən müqəddəs niyyətimiz çin
oldu və Azadlıq meydanında Zəfər paradına şahidlik etdik. Prezident İlham
Əliyevin dediyi kimi, bu parad tarixi hadisədir: "Azadlıq meydanında
paradlar çox keçirilib. Ancaq bu paradın xüsusi önəmi var. Bu, Zəfər paradıdır.
Bu, tarixi hadisədir. Paradların birində mən demişdim ki, parada 2016-cı ildə Lələtəpə
yüksəkliyində qaldırılmış bayraq gətiriləcək. Demişdim ki, gün gələcək və bu
gün işğaldan azad edilən torpaqlarda qaldırılan Azərbaycan bayrağı Azadlıq
meydanına gətiriləcək və bu gün gəldi. Bu tarixi günün şahidi bizik, Azərbaycan
xalqıdır. Biz bundan sonra ancaq və ancaq irəli gedəcəyik”.
Azərbaycan dövləti
həmişə olduğu kimi, müharibə günlərində də öz yanında Türkiyəni gördü. Türkiyə
bu günlərdə öz qardaşlıq borcunu ləyaqətlə yerinə yetirdi, Azərbaycanı sonadək
dəstəkləyəcəklərini dəfələrlə bəyan etməsi hər bir azərbaycanlını
qürurlandırdı. Odur ki, paradda iştirak etmək üçün Türkiyə Prezidenti Rəcəb
Tayyib Ərdoğanın Azərbaycana gəlməsi, o cümlədən Türkiyə hərbçilərinin nümunəvi
keçidi xalqımız tərəfindən sevinclə qarşılandı.
Ordumuz
missiyasını rəşadətlə yerinə yetirdi
44 günlük Vətən
müharibəsinin hər günü müasir döyüş imkanlarından istifadə edən Azərbaycan
Ordusunun müzəffər yürüşü ilə yadda qaldı. Elə bir cəbhə olmadı ki, əsgərlərimiz
hücum əməliyyatında ləngisinlər. Elə bir istiqamət olmadı ki, düşmənin müdafiə
mövqelərinin yarılması mümkün olmasın. Bununla yanaşı, əsas olan odur ki, bu
şanlı qələbəni Azərbaycan Ordusunun şəxsi heyəti, əsgərlərimiz, zabitlərimiz,
gizirlərimiz qazandılar. Hansı hərbi vasitələrdən istifadə etmələrindən asılı
olmayaraq bu qələbə sevincini xalqımıza hərbçilərimiz yaşatdılar.
Prezident İlham Əliyevin
dediyi kimi, bu qələbənin birinci qəhrəmanı Azərbaycan əsgəridir. Onu da qeyd
edim ki, İlham Əliyev əks-hücum əməliyyatlarının başladığı ilk günlərdə, şiddətli
döyüşlərin getdiyi bir vaxtda - sentyabrın 29-da Mehriban xanım Əliyeva ilə
birlikdə yaralanmış hərbçilərlə görüşmüşdü. Döyüşlər bitəndən dərhal sonra da
Ali Baş Komandanın Mehriban Əliyeva ilə birlikdə ilk qələbə təbrikini
çatdırdığı insanlar hərbiçilər oldu. Bu Azərbaycan Prezidentinin hərbçilərə
xüsusi münasibətinin, onlara yüksək diqqətinin növbəti təcəssümüdür.
Dövlət başçısının
Vətən müharibəsində əldə edilən parlaq qələbədə hərbiçilərin zəhmətini və fədakarlığını
xüsusi qeyd etməsi, onların müalicəsi və xəstəxanadan sonrakı həyatı üçün bütün
lazımi tədbirlərin görüləcəyini elan etməsi, hətta onlardan tibbi maskaları
çıxarmağı xahiş edərək hamının bu qəhrəmanları üzdən tanımasını istəməsi Ali
Baş Komandan kimi İlham Əliyevin hərbiçilərə olan dərin hörmətini, həssas və
olduqca səmimi münasibətini göstərir.
Paraddakı çıxışı
zamanı Prezident İlham Əliyev bir daha əsgər və zabitlərimizin qəhrəmanlığı barədə
danışaraq dedi: "Bu 44 günün hər günü bizim şanlı tariximizdir, hər gün Azərbaycan
irəli gedirdi. Bu 44 gün ərzində bir gün də olmamışdır ki, biz geri çəkilək.
Biz Ermənistanın 30 ilə yaxın müddət ərzində qurduğu istehkamları yararaq
keçmişik. Bu istehkamlar elə qurulmuşdu ki, Azərbaycan oradan keçə bilməsin, əsgərimiz
oradan keçə bilməsin. Eyni zamanda Dağlıq Qarabağ ərazisinin coğrafi relyefi də
Ermənistan tərəfi üçün daha əlverişli idi. Azərbaycan əsgər və zabitləri böyük
qəhrəmanlıq, şücaət göstərərək şərəfli missiyanı yerinə yetirdi və öz doğma
torpaqlarını işğalçılardan azad etdi”.
Bu tarixi qələbənin
qazanılmasında hərbçilərimizin yüksək vətənpərvərlik hisslərinə, döyüş əzminə
malik olmaları böyük rol oynadı. Döyüşlər başa çatandan sonra Ermənistan mənbələri
etiraf edirlər ki, Azərbaycan Ordusunun gücü qarşısında erməni əsgərləri cəbhənin
bütün istiqamətlərində qaçıblar, kütləvi şəkildə fərarilik ediblər. Bəli, Azərbaycan
əsgəri düşmənin üzərinə ölümdən belə çəkinmədən hünərlə, cəsarətlə yürüdü. Bu
yolla şəhidlik zirvəsinə ucaldı.
Vətən yolunda şəhid
olanların əziz xatirəsi daim uca tutulacaq, onların ailə üzvləri həmişə yüksək
dövlət qayğısı ilə əhatə olunacaqlar. Onu da qeyd edək ki, Şuşanın azad edilməsi
xəbərini Ali Baş Komandan məhz Şəhidlər xiyabanında çatdırmışdı. Bu xəbəri ilk
eşitməyə şəhidlərin haqqı kimi yanaşmışdı. Prezident İlham Əliyevin sərəncamı
ilə sentyabrın 27-nin Anım Günü kimi təsis olunması şəhidlərin xatirəsinə göstərilən
böyük ehtiramın nümunəsidir.
İlham Əliyevin qətiyyəti
Bu qələbənin digər
mühüm tərəfi Prezident İlham Əliyevin müharibə günlərində nümayiş etdirdiyi
yüksək qətiyyət və beynəlxalq təzyiqlərə sinə gərməsi oldu. Haqlı olaraq Azərbaycan
ictimaiyyəti İlham Əliyevin qətiyyətini zəfərimizin ən əsas şərtlərindən biri
kimi qəbul edir. Döyüşlərin ilk günündən dünya erməniliyi Azərbaycana qarşı təzyiq
rıçaqlarını işə saldı, BMT-də qətnamə qəbul etmək istədilər, İlham Əliyevə
davamlı zənglər olundu. Hətta Prezidentdən müsahibə alan bəzi xarici KİV təxribatçı
sualları ilə ermənipərəst dairələrin sifarişlərini yerinə yetirdi. Lakin hər
bir mərhələdə erməni təəssübkeşləri məğlubiyyətə uğradılar. Prezident İlham
Əliyev onların hər birinə siyasət və diplomatiya dərsi keçdi. BMT-də Ermənistanın
maraqlarına xidmət edən qətnamənin qəbul olunmasının qarşısı məhz İlham
Əliyevin diplomatik müdrikliyi sayəsində alındı. Xarici KİV-in əməkdaşları
İlham Əliyevin cavabları qarşısında heyranlıqlarını gizlədə bilmədilər.
Noyabrın 8-də
Şuşanın azad edilməsi ilə Qarabağ müharibəsinin gedişində ən mühüm hadisə baş
verdi. Prezident İlham Əliyevin Zəfər paradındakı çıxışında dediyi kimi,
Şuşanın azad edilməsi ilə düşmənin beli qırıldı: "Şanlı müharibəmizə Şuşa
şəhərində yekun vuruldu. Noyabrın 8-də Şuşa şəhərinin azad edilməsi tarixi
nailiyyətimizdir. Şuşa işğal altına düşmüş birinci şəhərimiz idi və işğaldan
azad edilən sonuncu şəhər oldu. Şuşa işğaldan azad ediləndən sonra düşmənin
beli qırıldı, düşmən təslim olmağa məcbur qaldı. Şuşanın azad edilməsi tarixi
hadisədir. Bizim Ordumuz, qəhrəman övladlarımız dağlardan, dərələrdən, meşələrdən,
cığırlardan keçərək, sıldırım qayaları qət edərək, qayalara dırmaşa-dırmaşa
Şuşaya qalxaraq orada əlbəyaxa döyüşdə düşməni məhv etdi, Azərbaycan bayrağını
Şuşada qaldırdı”.
Şuşanın azad
edilməsi ilə Ermənistan hakimiyyəti öz məğlubiyyətini açıq şəkildə etiraf etdi.
Buna qədər işğalçı ölkənin siyasi-hərbi dairələri yalan təbliğatla məşğul idilər.
Lakin noyabrın 8-dən sonra Azərbaycana məğlub olduqlarını etiraf etdilər və
Paşinyanın kapitulyasiya aktına imza atmaqdan başqa yolu qalmadı. Hərbi qələbələrdən
sonra imzalanan üçtərəfli bəyanat Azərbaycanın Vətən müharibəsindəki
siyasi-diplomatik qələbəsi oldu. Bu sənəd ordumuzun döyüş meydanındakı zəfərini
tamamladı. Sənədə əsasən, Azərbaycan Ordusu güllə atmadan Ağdamı, Kəlbəcəri və
Laçını işğaldan azad etdi.
Ümumiyyətlə, üçtərəfli
bəyanatın bütün bəndləri Azərbaycanın qalib dövlət kimi diqtələrindən ibarətdir.
Prezident İlham Əliyev hələ döyüşlərin ilk günlərindən irəli sürdüyü şərtləri
Ermənistana qəbul etdirdi. Üstəlik, sənədə əsasən, blokada şəraitində olan
Naxçıvanla quru əlaqəsi yaradılacaq.
Ali Baş Komandan
İlham Əliyevin rəhbərliyi ilə Azərbaycan Ordusunun tarixi qələbəsi vəziyyəti
kökündən dəyişib. İndi Azərbaycanın ərazi bütövlüyü təmin olunub, vaxtilə işğal
nəticəsində torpaqlarını tərk edən həmvətənlərimiz artıq məcburi köçkün deyillər.
Beləliklə, İlham Əliyev sübut etdi ki, söz anlamayan Ermənistanı güc yolu ilə
başa salmaq mümkündür. Erməni təəssübkeşləri, xüsusən Fransanın siyasi dairələri
Ermənistanın məğlubiyyətini həzm edə bilmirlər. Lakin nə qədər əhəmiyyətsiz sənədlər
qəbul etsələr də, Azərbaycanın qələbəsini etiraf etməkdən başqa yolları yoxdur.
Zəfər paradı Vətən
müharibəsinin növbəti şərəfli səhifəsi kimi tariximizi şərəfləndirdi, düşmənlərimizin
isə bağrına ox kimi batdı. Qüdrətlənən Azərbaycan Ermənistanı döyüş meydanında
məğlub etməklə tarixi ədaləti və ərazi bütövlüyünü bərpa etdi.
Səttar
MÖHBALIYEV,
Azərbaycan Həmkarlar
İttifaqları Konfederasiyasının sədri,
Milli Məclisin
deputatı
"AZƏRBAYCAN" qəzeti
12.12.2020 -ci il
