AHİK-in İcraiyyə Komitəsinin növbəti iclası keçirilib
14 Jan 2020
Yanvarın 14-də Azərbaycan Həmkarlar İttifaqları Konfederasiyası İcraiyyə Komitəsinin növbəti iclası keçirilib.
Giriş sözü söyləyən AHİK sədri, millət vəkili Səttar
Möhbalıyev iclasın gündəliyini təqdim edib.
Əvvəlcə İcraiyyə Komitəsinin və Konfederasiya aparatının
iş planı təsdiq olunub.
Sonra “Həmkarlar ittifaqı təşkilatlarının illik hesabatı”
haqqında AHİK-in 24 oktyabr 2013-cü il tarixli (pr.261) qərarının tələblərinə
uyğun olaraq üzv təşkilatlar tərəfindən statistik hesabatların vaxtında və
qaydalara uyğun təqdim edilməsinin vəziyyəti haqqında” məsələyə baxılıb. Bu barədə
İcraiyyə Komitəsinə verilən məlumatda bildirilib ki, həmkarlar ittifaqları
strukturlarının təkmilləşdirilməsi, yeni həmkarlar ittifaqı təşkilatlarının təsis
edilməsi, bərpası və həmkarlar ittifaqı üzvlərinin sayının artırılmasında həmkarlar
ittifaqı təşkilatlarının ümumi illik hesabatları xüsusi əhəmiyyət daşıyır.
Sahə həmkarlar ittifaqlarının (“Xidmət-İş” Hİ Federasiyası,
Dəmiryolçuların, Təhsil, Aviasiya, Elektroenergetika və Elektrotexnika Sənayesi
İşçiləri Həmkarlar İttifaqı və d.) üzv təşkilatlardan toplanan statistik
hesabatların yekunu seçkili orqanlarda müzakirə olunub. Aşkara çıxarılan
çatışmazlıqların aradan qaldırılması üçün qərarlar qəbul edilib, poçt və
elektron vasitələrlə ilk təşkilatlara çatdırılıb.
O da qeyd olunub ki, bəzi sahə Hİ-lərdə hesabatların üzv
təşkilatlarından toplanması, ümumiləşdirilməsi, AHİK-ə təqdim olunması və təhlil
edilərək müvafiq nəticələr çıxarılması işində müəyyən nöqsanlara da yol
verilib. İcraiyyə Komitəsi qərara alıb ki, az da olsa belə halların təkrar
olunmaması üçün nəzarəti gücləndirməli və ilk təşkilatlara lazımi köməklik göstərilməlidir.
Növbəti məsələ “Azərbaycan Respublikasının əhalisi
arasında 2017-2018-ci illərdə xəstələnmə hallarının analitik təhlili
haqqında” olub. İcraiyyə Komitəsinə təqdim olunan məruzədə deyilib ki, Azərbaycanda
səhiyyənin dinamik inkişafı təmin edilmiş, yeni tibb müəssisələri tikilərək
istifadəyə verilmiş, fəaliyyətdə olan tibb ocaqları əsaslı şəkildə təmir
olunaraq müasir tibb avadanlıqları ilə təchiz edilmiş, əhalinin müalicə-diaqnostika
məsələləri öz həllini tapmışdır. Ölkə Prezidenti cənab İlham Əliyevin tapşırığı
əsasında hər il təqribən 5 milyona yaxın Azərbaycan vətəndaşı pulsuz dispanser
müşahidəsi ilə təmin olunmaq imkanı əldə edir. Azərbaycanın bütün bölgələrində
müasir tələblərə cavab verən tibb mərkəzləri fəaliyyət göstərir. Bunun nəticəsidir
ki, indi müayinə və müalicə üçün regionlardan Bakı şəhərinə gəlməyə
ehtiyac qalmır. Ölkədə həyata keçirilən sosialyönümlü siyasətin müsbət nəticələri
tibbi-demoqrafik göstəricilərdə də öz əksini tapmışdır. Əhalinin, o cümlədən
işləyən vətəndaşların sağlamlığının mühafizəsi, onlara keyfiyyətli tibbi xidmətin
göstərilməsi respublika həmkarlar ittifaqı təşkilatlarının əsas vəzifələrindən
biri olaraq daima xüsusi nəzarətdədir. Həyata keçirilən tədbirlər nəticəsində bəzi
sahələrdə əmək qabiliyyətini müvəqqəti itirməyə görə iş günlərinin azalması
müşahidə olunmuşdur.
Təəssüflə qeyd olunub ki, iş vaxtı itkisinə gətirib
çıxaran müəyyən xəstəliklərin faiz dərəcəsinin aşağı salınması hələ də mümkün
olmayıb. Həmkarlar ittifaqı təşkilatları müayinə və təhlillər aparmalı, tərəfdaşları,
müvafiq qurumlarla birlikdə bu istiqamətdə tədbirlər planı hazırlayıb həyata
keçirməlidir.
İclasda həmçinin “Sosial təminatı və müdafiəni həyata
keçirən müvafiq icra hakimiyyəti orqanının 2020-ci il üçün büdcəsindən
sığortaolunanların sanatoriya-kurort müalicəsi və sağlamlaşdırma tədbirlərinin
həyata keçirilməsi üzrə Azərbaycan Həmkarlar İttifaqları Konfederasiyasına
ayrılan vəsaitlər barədə” məsələ müzakirəyə çıxarılıb, müvafiq qərar qəbul edilib.
Sonda S.Möhbalıyev yekun sözü söyləyib. Təqdim edilən məruzələrə
münasibətini bildirib, iradlarını və tövsiyələrini söyləyib. Deyib ki, hazırda ölkə
Prezidenti cənab İlham Əliyevin təşəbbüsü ilə ölkəmizdə ciddi, genişmiqyaslı
islahatlar gedir. Sözün həqiqi mənasında, inqilabi xarakter daşıyan bu
islahların məğzində “Güclü Azərbaycan, təminatlı vətəndaş” hədəfləri durur.
Artıq xalq bu islahatların nəticələrini öz həyatında görür, ondan faydalanır.
S.Möhbalıyev ölkə başçısının ötən il imzaladığı iki
sosial paket barədə ətraflı söz açıb. Bu islahatlar paketlərinin Azərbaycanı
regionda əhalisinin rifah halına görə ön yerlərdən birinə çıxardığını diqqətə
çatdırıb.
AHİK sədri Prezident İlham Əliyevin yanında 2019-cu ilin
yekunlarına həsr olunmuş müşavirədə dövlət başçısının çıxışını xatırladıb: “Cənab
Prezident hər kəsi öz vəzifəsinin öhdəsindən layiqincə gəlməyə, görülən işlərə
töhfə verməyə çağırdı. Ətrafında yüz minlərlə üzvü birləşdirən həmkarlar
ittifaqı da xalqımızın daha yüksək rifahı, vətənimizin çiçəklənməsi naminə dövlətimizin
yeritdiyi daxili siyasətin reallaşması üçün var qüvvəsini əsirgəməməlidir”.
AHİK sədri
İcraiyyə Komitəsinin üzvlərini, bütünlüklə həmkarlar ittifaqı işçilərini, üzvlərini
qarşıdan gələn parlament seçkilərində fəal iştirak etməyə çağırıb.
