AHİK-in nümayəndələri Bolqarıstanda olublar
08 Feb 2019
Fevralın 8-9-da Bolqarıstan Əmək Konfederasiyasının (RODKREPA) onuncu qurultayı keçirilib.
Paytaxt Sofiya şəhərindəki Milli Konqres Mərkəzində baş
tutan qurultayı salamlama nitqi ilə Konfederasiyanın prezidenti Dimitar
Manolov və fəxri sədri Konstantin Trençev açıblar.
Respublika prezidenti Rumen Radev, Baş nazir Boyko
Borisov, əmək və sosial inkişaf, maliyyə nazirləri, ombudsman və başqaları
çıxış edərək təşkilatın keçdiyi şərəfli yoldan danışıblar. Deyiblər ki, bu
qurum hələ totalitar, sosialist rejimi dövründə üzərinə düşən vəzifəni güzəştsiz
yerinə yetirmiş, iqtidarların təzyiqlərinə qarşı barışmaz mövqe nümayiş
etdirmişdir. Çıxışlarda müasir Bolqarıstanda sosial-iqtisadi proseslərin tənzimlənməsində,
işçilərin əmək hüquqlarının qorunmasında Konfederasiyanın, onun üzv təşkilatlarının
yeri və rolu yüksək qiymətləndirilib.
Beynəlxalq Həmkarlar İttifaqları Konfederasiyasının Baş
katibi xanım Şaran Barrou Bolqarıstan həmkarlar ittifaqının təkcə ölkə daxilində
deyil, bütövlükdə Avropa məkanında böyük nüfuza malik olduğunu vurğulayıb. Onu
milli maraqların daşıyıcısı kimi xarakterizə edib. Nüfuzunun səbəbini təşkilatın
daim üzvlərin yanında olması ilə əlaqələndirib.
Qurultayın gedişi, hesabat məruzəsi və məruzə ətrafında
çıxışlar da Konfederasiyanın ünvanına söylənən xoş sözlərin təsadüfi olmadığını
sübut edib. Sonda təşkilati məsələyə baxılıb. Dimitar Manolov yenidən
yekdilliklə Konfederasiyanın sədri seçilib.
Qurultaya 600 nümayəndə, dövlət rəsmiləri, beynəlxalq və
xarici ölkə həmkarlar ittifaqları təşkilatlarından qonaqlar dəvət olunmuşdu.
Yeri gəlmişkən, Bolqarıstan Əmək Konfederasiyası 1989-cu
il fevralın 8-də təsis edilib. Təşkilatın ilk prezidenti Konstantin Trençev
olub. 150 min üzvü var. Beynəlxalq Həmkarlar İttifaqları Konfederasiyası və
Avropa Həmkarlar İttifaqları Konfederasiyasının üzvüdür.
Qurultayda Azərbaycan Neft və Qaz Sənayesi İşçiləri Həmkarlar
İttifaqı Respublika Komitəsinin sədri Cahangir Əliyev və AHİK-in beynəlxalq əlaqələr
şöbəsinin müdiri Fuad Məmmədov da iştirak ediblər.
