ATİAHİ Rəyasət Heyətinin iclası keçirilib
17 Apr 2019
Aprelin 17-də Təhsil İşçiləri Azad Həmkarlar İttifaqı (TİAHİ) Respublika Komitəsi Rəyasət Heyətinin iclası keçirilib.
ATİAHİ
Respublika Komitəsinin sədri, millət vəkili Səttar Möhbalıyevin sədrliyi ilə keçirilmiş
iclasda Respublika Komitəsinin xidmətinə daxil olan bütün şəhər, rayon və rayon
hüquqlu həmkarlar ittifaqı komitələrinin sədrləri iştirak edib.
S.Möhbalıyev əvvəlcə Rəyasət Heyətinin üzvlərini iclasın
gündəliyi ilə tanış edib. Sonra gündəlik səsə qoyularaq qəbul edilib.
Gündəlikdə “2018-ci il ərzində Təhsil İşçiləri Azad Həmkarlar
İttifaqı Respublika Komitəsində və üzv təşkilatlarında vətəndaşların qəbulu, ərizə
və şikayətlərə baxılmasının vəziyyəti barədə”, “Təhsil İşçiləri Azad Həmkarlar
İttifaqı Respublika Komitəsinin üzv təşkilatlarının 2018-ci ilin yekunları üzrə
statistik hesabatları”, “2018-ci ilin yekunlarına görə Təhsil İşçiləri
Azad Həmkarlar İttifaqı Respublika Komitəsinin büdcəsinin yerinə yetirilməsi
haqqında” məsələlər, eləcə də cari məsələlər öz əksini tapıb.
Birinci məsələ ilə bağlı TİAHİ sədrinin müavini Mirzə Cəfərzadə
məlumat verib. Bildirib ki, bu müddətdə ittifaq üzvləri tərəfindən edilmiş
müraciətlər diqqətlə araşdırılıb, onlara lazımi kömək göstərilib: “2018-ci il ərzində
TİAHİ üzv təşkilatlarına və Respublika Komitəsinə ittifaq üzvlərindən maddi
yardım, əmək hüquqlarının müdafiəsi, yollayışların alınması, müxtəlif sosial
xarakterli bəzi məsələlər ilə bağlı daxil olmuş ərizələrin çoxu müsbət həll
olunub”.
RK-nın təşkilat şöbəsinin müdiri Emil Rüstəmov 2018-ci ilə
dair ümumi illik statistik hesabat barədə məruzəni təqdim edib. Deyib ki, qeyd
olunan dövr ərzində həmkarlar ittifaqı üzvlərinin sayında artım müşahidə
olunub. Üzvlərin sayı 379053 nəfərə çatıb. Artım ali təhsil müəssisələrində ödənişli
əsaslarla təhsil alan tələbələrin sıralarımıza daxil edilməsi hesabına baş
verib. Cari ilin yanvarın birinə olan məlumata görə üzvlərimizin 246882 nəfəri
qadın, 132171 nəfəri isə kişilərdir. Həmkarlar ittifaqlarının seçkili orqanlarında
32681 nəfər həmkarlar ittifaqı fəalı qeydiyyata alınmışdır ki, onlardan 18798 nəfəri
qadın, 5951 nəfəri isə gənclərdir.
Üçüncü məsələ haqqında isə RK-nın katibi, maliyyə şöbəsinin
müdiri Mübariz Eyvazov danışıb.
Gündəlikdə duran məsələlər ayrı-ayrılıqda müzakirə
olunub, müvafiq qərarlar qəbul edilib.
İclasın gündəliyində əks olunan məslələrlə bağlı TİAHİ
Respublika Komitəsinin sədri, millət vəkili Səttar Möhbalıyev öz tövsiyələrini
verib. RK sədri qeyd edib ki, istər Respublika Komitəsi, istərsə də üzv təşkilatlar
daxil olan bütün müraciətlərə həssas yanaşmalı və ittifaq üzvlərinin problemlərinin
aradan qaldırılmasına çalışmalıdır: “Edilən müraciətlərə laqeyd
yanaşılmamalıdır. Hər bir insanı qəbul edib dinləmək lazımdır. Çalışmaq
lazımdır ki, səlahiyyətlərimiz çərçivəsində problemlərin aradan qaldırılmasına
köməklik göstərək. Xüsusən işdən azad olunmalar zamanı diqqətli olmaq lazımdır.
Araşdırılma aparılmadan qəti qərar vermək olmaz”.
S.Möhbalıyev həmkarlar ittifaqı komitələrinin sədrlərini
aktiv olmağa, müəyyən məsələlərlə bağlı təkliflər verməyə çağırıb.
