Görülən işlər qənaətbəxş qiymətləndirilib
28 Nov 2018
Noyabrın 28-də Dəmiryolçuların Müstəqil Həmkarlar İttifaqı Respublika Komitəsinin IV plenumu keçirilib.
Respublika Komitəsinin sədri Fəzail Bağırov çıxış edərək
bildirib ki, sahə üzrə son illərdə əldə olunan uğurlar işçilərin qanuni
hüquqlarının həyata keçirilməsi işinə də müsbət təsir göstərib. Əmək Məcəlləsinin elə bir tələbi yoxdur ki,
ona əməl olunması istiqamətində tədbirlər görülməsin. Mən yalnız bir faktı diqqətinizə çatdırmaqla
kifayətlənəcəm. Oktyabrın 13-də sahə işçilərinin peşə bayramı münasibətilə
keçirilən təntənəli yığıncaqda 22 nəfər dəmiryolçuya cəmiyyətin vəsaiti
hesabına tikilmiş mənzillərin açarları verilib. Bildiyiniz kimi, Əmək Məcəlləsinin
maddələrindən biri də işçilərin əməyinin layiqincə dəyərləndirilməsidir. Bizim
və tərəfdaşımız olan QSC-nin rəhbərliyi tərəfindən bir qrup sahə işçisi ali
dövlət mükafatlarına təqdim olunmuşdu. Həmin mükafatlar da elə adını çəkdiyim təntənəli
iclasda sahiblərinə verilib.
Sonra məruzə üçün söz Respublika Komitəsinin
sosial-iqtisadiyyat şöbəsinin müdiri Fətəli Bəyimov və baş texniki əmək müfəttişi
Hüseyn Cəfərova verilib. Natiqlər bildiriblər ki, Cəmiyyətdə işçilər əmək
müqaviləsinə uyğun və ştat cədvəli üzrə vəzifəsi qeyd olunmaqla, işə götürülürlər.
İşçilərlə bağlanmış əmək müqavilələri, eləcə də razılaşmalar, müəssisədə fəaliyyət
göstərən həmkarlar ittifaqı təşkilatının qabaqcadan razılığı alınmaqla, əmək
qanunvericiliyinə uyğun olaraq ləğv edilir.
İşçilərin əməyinin ödənilməsi sistemi təkmilləşdirilərək,
bütün işlərin xüsusiyyətləri nəzərə alınmaqla, yeni tarif dərəcələri və vəzifə
maaşları hazırlanaraq hər ilin əvvəlində ştat cədvəlləri təsdiq edilir. İşçilərin
əmək prosesi, eləcə də sosial təminatları əmək qanunvericiliyi ilə müəyyən
edildiyi kimi həyata keçirilir.
Natiqlər “ADY” QSC-nin departament, MMC, idarə və müəssisələrində
əməyin mühafizəsinin ümumi vəziyyəti haqqında da məlumat veriblər. Bildiriblər ki,
yeni maşın-mexanizm, qurğu və avadanlıqların alınması və istismara verilməsi əl
əməyinin yüngülləşməsinə, təhlükəsizliyinə, əmək şəraitinin
yaxşılaşdırılmasına səbəb olub. Ətraf mühitin mühafizəsi sahəsində daimi olaraq
müəssisələrin ərazilərində dəmir yolu zolağı boyunca abadlaşdırma,
yaşıllaşdırma işləri aparılır. İş otaqları təmir edilib, kondisionerlərlə
təchiz olunub, otaqların qızdırılması və işıqlandırılması üçün
lazımi tədbirlər görülüb. Əmək Məcəlləsinin 62-ci və 226-cı maddələrinin tələblərinə
əsasən, işçilər ilkin və növbəti tibbi müayinədən vaxtlı-vaxtında
keçirilir. 215-ci maddəyə əsasən isə, işçilərə müəyyən edilmiş müddətlərdə
və tələb olunan çeşidlərdə pulsuz xüsusi geyim, ayaqqabı və digər fərdi mühafizə
vasitələrinin verilməsi təsbit edilib. Belə ki, ağır, zərərli və təhlükəli işlərdə
çalışan işçilər müəssisə tərəfindən xüsusi iş geyimləri ilə təmin
olunurlar.
Məruzələr ətrafında çıxışlarda görülən işlər qənaətbəxş
qiymətləndirilib.
Plenumun
işində Azərbaycan Həmkarlar İttifaqları Konfederasiyası sədrinin müavini
Cavanşir Alxasov iştirak və çıxış edib.
