Hesabat-seçki yığıncaqlarına hazırlıq işlərinə başlandı
02 Oct 2019
Təhsil İşçiləri Azad Həmkarlar İttifaqının (TİAHİ) Nizamnaməsinə uyğun olaraq 2020-ci il ittifaqın ilk təşkilatlarında hesabat-seçkilər ilidir.
Artıq Respublika Komitəsi tərəfindən bununla bağlı
hazırlıq işlərinə başlanılıb, zona seminarlarına start verilib. İlk belə
seminar sentyabrın 24-də Şəki şəhərində keçirilib. Seminarda Respublika Komitəsi
sədrinin müavini Mirzə Cəfərzadə təşkilat şöbəsinin müdiri Emil Rüstəmov çıxış
edərək bildiriblər ki, hesabat-seçki konfransları 6 minə yaxın ilk təşkilatı
əhatə edəcək. Bu seçkilərdə ilk təşkilatların sədrləri hesabat dövründə
görülmüş işlərlə bağlı hesabat verəcək, təşkilatların seçkili orqanları yenidən
formalaşdırılacaq: “İlk təşkilatlarda keçirilən hesabat-seçki yığıncaqları
TİAHİ-nin həyatında mühüm əhəmiyyət kəsb edir. Həmkarlar ittifaqı mərkəzlərinin
gücü onların ilk təşkilatlarındadır. İlk təşkilatlar nə qədər güclü olacaqsa,
bu təşkilata sədrlik edən şəxslər nə qədər nüfuzlu şəxlər olacaqsa, bizim
ittifaqımız da o qədər nüfuzlu olacaq. Bu baxımdan şəhər və rayon komitələrinin
sədrləri bu seçkilərə ciddi yanaşmalı, gender bərabərliyi, gənclərin irəli çəkilməsi
də nəzərər alınmaqla, ilk təşkilatların seçkili orqanları demokratik seçki yolu
ilə yenidən formalaşdırılmalıdır”.
Seminarda həmçinin Təhsil Nazirliyi və Təhsil İşçiləri
Azad Həmkarlar İttifaqı Respublika Komitəsi arasında bağlanmış “2019-2021-ci
illər üçün kollektiv saziş”də əksini tapan müddəalar müzakirə olunub. Şəhər və
rayon komitə sədrləri rayon komitələri ilə təhsil şöbələri arasında bağlanmış
kollektiv müqavilələr barədə məlumat veriblər.
Oktyabrın 2-də isə Quba rayonunda regional seminar
keçirilib. Tədbirdə TİAHİ Respublika Komitəsinin Təşkilat şöbəsinin müdiri Emil
Rüstəmov, Əməkhaqqı və sosial müdafiə şöbəsinin müdiri Zəfər Məmmədov, Maliyyə
şöbəsinin aparıcı məsləhətçisi Vüqar Həsənov, TİAHİ Quba, Qusar, Xaçmaz,
Şabran, Xızı, Siyəzən rayon komitələrinin sədrləri və həmkarlar ittifaqı fəalları
iştirak ediblər. Tədbirdə E.Rüstəmov çıxış edərək hesabat-seçki konfranslarının
keçirilməsi ilə bağlı görülən işlərdən danışıb, seminar iştirakçılarına müvafiq
tövsiyələrini verib.
Seminarda həmçinin Z.Məmmədov çıxış edərək rayon komitələri
ilə təhsil şöbələri arasında bağlanmış kollektiv müqavilələrin şərtlərinin
yerinə yetirilməsi ilə bağlı görüləcək işlərdən danışıb.
