İşçilərin maraqları ön plandadır
19 Nov 2019
“Ölkə başçısı cənab İlham Əliyev noyabrın 19-da Bakı Dəmiryolu Vağzalında bir qrup dəmiryolçu ilə görüşərkən dəmir yollarının yenidən qurulması istiqamətində çox böyük işlər görüldüyünü, Davos Dünya İqtisadi Forumunda Azərbaycan dəmir yollarının səmərəliliyi baxımından dünyada 12-ci yerdə, dəmir yollarının keyfiyyətinə görə isə 34-cü yerdə olduğunu, eləcə də dəmir yollarının abadlaşdırılması, dəmir yolu xidmətlərinin təkmilləşdirilməsi istiqamətində son illər ərzində böyük irəliləyişlərin olduğunu demişdi.
Cənab Prezidentin söylədiyi bu ifadələr hər bir dəmiryolçunun
qəlbində iftixar hissi doğurdu, daha yaxşı işləmələrinə dəyərli stimul oldu”.
Bu sözlər Dəmiryolçuların Müstəqil Həmkarlar İttifaqı
Respublika Komitəsinin noyabrın 27-də keçirilmiş plenumunda səsləndi. Plenumda
giriş sözü söyləyən Respublika Komitəsinin sədri Fəzail Bağırov təşkilatın son
iki ildə qarşısında duran vəzifələrə və onların həlli istiqamətində atılan
addımlara diqqət çəkdi. Xüsusilə tərəfdaşları ilə, işçilərin maraqları üzərində
qurulan əlaqələrdən danışdı. Plenum üzvlərinə bəzi tövsiyələrini də verdi. Dedi
ki, işəgötürən tərəfindən işçilərin işdən azad edilməsi barədə müraciətləri
diqqətlə araşdırılmalı, maksimum dərəcədə işçilərin maraqları nəzərə
alınmalıdır. Digər bir tövsiyəsi ondan ibarət oldu ki, lokomotiv briqadalarının
ay ərzində nəzərdə tutulduğu limitdən artıq işləməsi hallarına yol verilməsin.
Belə hallar vaxtında aşkara çıxarılıb qarşısı alınmalıdır.
Sonra Qapalı Səhmdar Cəmiyyətin rəhbərliyi ilə Respublika
Komitəsi arasında 2017-2019-cu illər üçün bağlanmış kollektiv sazişin yerinə yetirilməsi
mövzusunda məruzə dinlənildi. Məruzədə deyildi ki, Sazişin 9.3-cü bəndinə əsasən,
verilən müavinətlərdən əlavə olaraq, öz təşəbbüsü ilə əmək müqaviləsi ləğv edilən
işçilərə tarif (vəzifə) maaşlarının 5 misli məbləğində birdəfəlik müavinətlər
verilmişdir. Pensiya yaşına çatan işçilərə pensiya yaşına çatdığı tarixdən,
habelə əlillik dərəcəsi təyin edilmiş işçilərə əlillik dərəcəsinin təyin
olunduğu tarixdən 15 iş günü müddətində tarif (vəzifə) maaşlarının 5 misli məbləğində
birdəfəlik müavinətlər ödənilmişdir.
Cəmiyyətdə işçilərin iş və istirahət vaxtı Əmək Məcəlləsinin
və kollektiv sazişin müddəalarına uyğun olaraq tənzimlənir.
Kollektiv sazişin müvafiq bəndlərinə əsasən, işəgötürən tərəfindən
işçinin yaxın qohumları vəfat etdikdə ona 3 gün müddətində, yeni dərs ilinin
başlanması ilə əlaqədar uşağı birinci sinifə gedən işçiyə 1 gün müddətində, zərərli
və ağır işlərdə çalışanlara əlavə məzuniyyətdən savayı 5 təqvim günü ödənişli məzuniyyət
verilir.
Üç yaşından 16 yaşınadək uşağı olan anaların öz razılığı
olmadan gecə işlərinə, iş vaxtından artıq işlərə, bayram və qeyri-iş günlərində
işə cəlb edilməsinə və ezamiyyətə göndərilməsinə yol verilmir. Hamilə, 16
yaşına çatmamış uşağı olan və ya ailənin xəstə üzvünə qulluq edən qadının
xahişi ilə tibbi rəy əsasında onun üçün natamam iş günü və ya iş həftəsi müəyyən
edilir.
Gündəlik iş vaxtının ən azı yarısı gecə vaxtına düşən
növbəli işlərdə çalışan işçilər, saatlıq tarif (vəzifə) maaşının 40 faizi məbləğində
əlavə haqq alırlar.
Bütün işçilər, iş stajına müvafiq olaraq, aylıq tarif (vəzifə)
maaşlarının 5-20 faizi həcmində mükafatlandırılırlar.
Çernobıl qəzasının ləğvində iştirak etmiş və zərərçəkmiş
8 nəfər işçiyə işlədiyi yerdən ildə bir dəfə 400 manat miqdarında pul
kompensasiyası ödənilir.
Mənzil şəraitinin yaxşılaşdırılmasına ehtiyacı olan dəmiryolçuların
mənzillə təminatı vahid siyahı üzrə növbə əsasında həyata keçirilir.
Məruzədə deyildi ki, Respublika Komitəsinə ötən il 1246 ərizə
daxil olmuşdur. Onların hamısı ciddi araşdırılmış, müvafiq tədbirlər görülmüşdür.
2017-2019-cu illərdə dəmiryolçulara və onların ailə üzvlərinə
sanatoriyalara və istirahət evlərinə 844 yollayış vərəqələri verilmişdir. Maddi
vəziyyəti ağır olan 73 dəmiryolçu yollayışları pul ödəmədən almışdır.
Respublika Komitəsinin maliyyə vəsaiti hesabına və Cəmiyyət
rəhbərliyinin maliyyə köməyi ilə “Lokomotiv” İstirahət Mərkəzində tikinti işlərinin
son mərhələsi başa çatdırılmaqdadır. Ötən 3 ildə yay mövsümlərində bu istirahət
mərkəzinə təşkil olunmuş 27 gedişdə 576 dəmiryolçu ailəsinin 2203 nəfər üzvü
istirahət etmişdir.
Hər il Respublika Komitəsinin müvafiq qərarına uyğun
olaraq, 13 Oktyabr - Dəmir Yolu İşçilərinin Peşə Bayramı Günü ərəfəsində dəmiryolçuların
spartakiadası keçirilir. Spartakiada qaliblərinə kuboklar, pul mükafatları və
diplomlar təqdim edilir.
Məruzə ətrafında çıxışlarda qeyd olundu ki, istər Cəmiyyət
rəhbərliyi, istərsə də Respublika Komitəsi tərəfindən ötən dövr üçün imzalanmış
kollektiv sazişin öhdəlikləri tam yerinə yetirilmişdir. Plenum kollektiv
sazişin icrasını qənaətbəxş hesab etdi.
Qərar layihəsinin müzakirəsi zamanı təklif olundu ki, ona
“uzun müddət dəmiryolu sistemində çalışmış, fəxri dəmiryolçu döş nişanına layiq
görülmüş veteranlar da sahə tibb ocaqlarının xidmətindən pulsuz istifadə etmək
hüququna malik olsun” cümlələri əlavə olunsun. Bu təklif yekdilliklə bəyənildi.
Sonra təşkilati məsələyə baxıldı. Samir Böyükzadə
Respublika Komitəsinin sədr müavini- təşkilat şöbəsinin müdiri vəzifəsinə təsdiq
olundu.
Tədbirdə AHİK sədrinin müavini Aqil Dadaşov çıxış etdi.
Plenum üzvlərinə AHİK sədri, millət vəkili Səttar Möhbalıyevin salamlarını
çatdırdı. Dedi ki, sizin fəaliyyətiniz Konfederasiya rəhbərliyi tərəfindən həmişə
yüksək qiymətləndirilmişdir. İqtisadiyyatımızın mühüm sahəsi olan dəmiryolu
işçilərinin əmək, sosial hüquqlarının qorunması, istirahətinin təşkili işində səylərinizi
əsirgəməmisiniz.
A.Dadaşov
plenum üzvlərinə növbəti dövrdə də uğurlar arzuladı.
