Kopenhagendə görüşlər
08 Dec 2018
Xəbər verdiyimiz kimi, dekabrın 2-dən 7-dək Danimarkanın paytaxtı Kopenhagen şəhərində Beynəlxalq Həmkarlar İttifaqları Konfederasiyasının (BHİK) IV qurultayı keçrilib.
Dünyanın qlobal iqtisadi, sosial problemlərini gündəmə gətirən
ali məclisin iclaslarında 132 ölkədən 1200 nəfərdən çox nümayəndə iştirak edib.
Qurultayda qloballaşan iqtisadiyyatın yaratdığı problemlərə qarşı mütəşəkkil
mübarizə, planetimizdə sülhün bərqərar olmasından ötrü həmrəylik çağırışları səsləndirilib.
Həmkarlar ittifaqlarının bir təşkilat kimi fəaliyyətini davam etdirməsi üçün vəzifələr
müəyyənləşdirilib.
Tədbirdə Azərbaycan Həmkarlar İttifaqları
Konfederasiyasının sədri, Milli Məclisin üzvü Səttar Möhbalıyev də çıxış edərək
BHİK-in hesabat dövründəki fəaliyyətinə münasibət bildirib, bu qurumun növbəti
5 ildə həyata keçirməli olduğu vəzifələrə toxunub.
Qurultay sonda qətnamələr və bəyanat qəbul edib və rəhbər
orqanlara seçkilər keçirilib. S.Möhbalıyev növbəti müddətə BHİK-in
vitse-prezidenti seçilib.
Qurultay günlərində S.Möhbalıyev beynəlxalq həmkarlar
ittifaqı liderləri ilə də görüşüb. BHİK-in yenidən seçilmiş Baş katibi Şaron
Barrou ilə görüş qarşılıqlı təbriklərlə başlayıb. Ş.Barrou Səttar Möhbalıyevə
göstərilən etimadı onun beynəlxalq həmkarlar ittifaqı hərəkatındakı xidmətlərinin
bəhrəsi adlandırıb. Azərbaycan həmkarlar ittifaqlarının BHİK-in ən fəal üzv təşkilatı
olduğunu məmnuniyyətlə qeyd edib. Onun namizədliyini sonadək dəstəklədiyinə görə
AHİK sədrinə minnətdarlığını bildirib və əminliklə deyib ki, bundan sonra da təşkilatlarımız
arasında işgüzar münasibətlər yüksək səviyyədə olacaq.
S.Möhbalıyev görüşdə bildirib ki, vitse-prezident vəzifəsinə
namizədliyimin irəli sürülməsində və müdafiə olunmasında Sizin də rəyiniz mühüm
rol oynayıb. Buna görə təşəkkürümü qəbul edin. Siz, Baş katib olaraq, dünya həmkarlar
ittifaqının mütəşəkkilliyini və mübarizliyini qat-qat artırmaq bacarığına
sahibsiniz. Sizin fədakar əməyiniz və təşkilatçılığınız sayəsində BHİK gələcəkdə
də dövlətlərin sosial siyasətinə təsir gücünə malik qurum olaraq qalacaqdır.
S.Möhbalıyev söhbətdə BHİK-lə AHİK-in əməkdaşlıq əlaqələrini
xatırladıb. Deyib ki, Azərbaycanda BHİK-lə birlikdə onlarla məşğulluq, təhlükəsiz
əmək, gənclər, gender bərabərliyi və sair məsələlərə dair konfrans, seminar, dəyirmi
masa keçirilib. Həmin tədbirlərdə iştirak edən həmkarlar ittifaqı liderləri,
fəalları dünya təcrübəsini öyrənib, yeni fəaliyyət metodlarına yiyələniblər. Təşkilatınızın
göstərdiyi maddi-texniki, metodiki kömək də fəaliyyətimizin daha səmərəli
olmasına impuls verib. Biz BHİK-in bütün layihələrinə dəstək vermişik, bundan
sonra da dəstəyimizi əsirgəməyəcəyik.
Növbəti görüş Danimarka Həmkarlar İttifaqları
Konfederasiyasının prezidenti xanım Lizetta Risqordla keçirilib. AHİK sədri öncə
bu mühüm qurultayın yüksək səviyyədə Kopenhagen şəhərində təşkilinə görə ev
sahibinə təşəkkürünü bildirib. S.Möhbalıyev Danimarkanın son dövrlərdə dünyanın
ən inkişaf etmiş ölkələrindən birinə çevrilməsinin səbəbini düzgün iqtisadi
idarəetmənin və sosial dövlət modelinin lazımi səviyyədə tətbiq edilməsi ilə əlaqələndirib.
Xanım Lizetta Risqord Danimarkada azərbaycanlıların
yaşadıqlarını qeyd edərək bildirib ki, təşkilatlarımız arasında əlaqələr gücləndirilməli,
qarşılıqlı səfərlər təşkil olunmalı və birgə komissiyalar yaradılmalıdır.
Qurultay günlərində yadda qalan görüşlərdən biri də AHİK
sədrinin Albaniya Həmkarlar İttifaqları Konfederasiyasının sədri Gezim Kalaya
ilə olub. S.Möhbalıyev son dövrlər Albaniya Həmkarlar İttifaqları
Konfederasiyası ilə qurulan əməkdaşlıq əlaqələrinə məmnunluqla toxunub. Bildirib ki, ötən ilin sentyabr ayında AHİK
nümayəndə heyətinin Albaniya Hİ Konfederasiyasının qurultayında iştirakı, eləcə
də alban həmkarlarının nümayəndə heyətinin bu ilin fevral ayında keçirilən
AHİK-in V qurultayında iştirakı dostluq əlaqələrinin təzahürüdür. Görüşdə Albaniya
Həmkarlar İttifaqları Konfederasiyasının sədri Gezim Kalaya öz təşkilatı
haqqında geniş məlumat verib. Deyib ki, təşkilatın çətin günləri artıq arxada
qalıb. O, fürsətdən istifadə edərək AHİK sədrini Albaniyaya işgüzar səfərə dəvət
edib.
AHİK nümayəndə heyətinin rəhbəri, millət vəkili Səttar
Möhbalıyev qurultayın son günü Çin Əmək Federasiyasının prezidenti Çen Çieh ilə
görüşüb. S.Möhbalıyev Çin Əmək Federasiyası ilə əməkdaşlığın gücləndirilməsini,
təşkilatlarımız arasında qarşılıqlı əlaqələrin artırılmasının zəruriliyini diqqətə
çatdırıb. Çin Əmək Federasiyasının prezidenti Çen Çieh AHİK sədrini yüksək vəzifəyə
- BHİK-in vitse-prezidenti vəzifəsinə yenidən seçilməsi münasibətilə təbrik
edib, ona gələcək fəaliyyətində uğurlar arzulayıb.
