“Layiqli əmək-ədalətli iqtisadiyyata gedən yoldur”
07 Oct 2019
Oktyabrın 7-də Müdafiə Nazirliyinin Bakı Qarnizonunda “Ümumdünya Layiqli Əmək Günü”nə həsr olunmuş seminar keçirilmişdir
“Layiqli əmək-ədalətli iqtisadiyyata gedən yoldur”
mövzusunda baş tutan tədbirdə Azərbaycan Həmkarlar İttifaqları
Konfederasiyasının texniki əmək müfəttişi Nadir Muradov zərərli maddələrlə
çalışan işçilərə əlavə ödənişlərin verilməsi, Nazirlər Kabinetinin təsdiq
etdiyi zərərli və ağır istehsalatların, peşə və vəzifələrin siyahısı ətrafında
yaranmış mübahisələr barədə danışmışdır. O, ictimai müvəkkillərin il boyu
istehsalat sahələrində, tikintilərdə, müəssisələrdə iş şəraiti, əməyin mühafizəsi
ilə bağlı monitorinqlər aparmasına, işəgötürənə aşkar olunan nöqsan və
çatışmazlıqların aradan qaldırılması ilə bağlı tövsiyə və təkliflərini yazılı təqdimat
şəklində vermələrinin önəminə diqqət çəkmişdir. N.Muradov deyib ki, işəgötürən
tərəfindən əməyin mühafizəsinə çəkilən xərclərdən, əməyin mühafizəsinə dair
hazırlanmış hesabatlardan həmkarlar ittifaqları mütləq xəbərdar olmalıdır. O, həmçinin
Nazirlər Kabinetinin 550 və 38 nömrəli qərarları haqqında seminar
iştirakçılarını məlumatlandırıb.
AHİK-in etimadlı həkimi Zöhrab Mansurov çıxışında bildirib
ki, bu ildən həkimlərin orta aylıq əməkhaqqı fondu 1.6 dəfə artıb. Yanvarın 1-dən
ölkədə icbari tibbi sığortanın tətbiqinə başlanılacaq. Tibbi sığorta əhalinin
tibbi və dərman yardımı almasına təminat verir. O, icbari tibbi sığorta üçün
aylıq ödənişin 4% olacağını, bunun 2%-nin işəgötürən, qalan 2%-nin isə işçi tərəfindən
ödəniləcəyini qeyd edib. Deyib ki, icbari tibbi sığortadan əcnəbilər və vətəndaşlığı
olmayan şəxslər də yararlana biləcəklər. İşləməyənlər icbari tibbi sığorta üçün
ildə 120 manat ödəyəcəklər. Tələbələr, təqaüdçülər üçün isə tibbi sığorta dövlət
tərəfindən ödəniləcəkdir.
İclas diskussiya ilə yekunlaşıb.
