Mükafatlar bayram günü təqdim olundu
08 Nov 2019
Noyabrın 8-də Cəmşid Naxçıvanski adına Hərbi Liseydə Dövlət Bayrağı Gününə həsr edilmiş tədbir keçirilib.
Kursantların zal boyu keçərək çiyinlərində səhnəyə
qaldırdıqları möhtəşəm bayraq auditoriya tərəfindən gurultulu alqışlarla
qarşılanıb. Rəsmi hissədə Vətən, torpaq, müqəddəs bayrağımız haqqında çıxışlar
səslənib.
Tədbirdə AHİK-in nümayəndəsi X. Bağırova çıxış edərək komandir
heyətinə və kursantlara AHİK sədri, millət vəkili Səttar Möhbalıyevin təbrikini
çatdırıb. Deyib ki, hərbi lisey artıq 20 ilə yaxındır ki, AHİK tərəfindən mədəni
hamiliyə götürülmüşdür. Bu illər ərzində liseydə təhsil alan gənc hərbçilər
arasında mütəmadi olaraq vətənpərvərlik mövzusunda mədəni-kütləvi tədbirlər,
baxış-müsabiqələr, idman yarışları keçirilir, dərs əlaçılarına, müsabiqə qaliblərinə
AHİK-in diplomları və qiymətli hədiyyələri, sahə HİRK-lərinin pul mükafatları təqdim
olunur. Təşkilatımız gənclərin dünyagörüşünün formalaşmasında böyük əhəmiyyət kəsb
edən bu cür tədbirləri keçirməklə öz hamilik missiyasını davam etdirir.
İnanırıq ki, bu gün istedadlarını üzə çıxardığımız kursantlar gələcəkdə daha
böyük uğurlara nail olacaq, ordumuzun gələcək zabitləri kimi əzmlə Vətənimizin,
torpaqlarımızın keşiyində duracaqlar.
Sonra 2018/2019-cu tədris ili üzrə yüksək göstəricilər əldə
edən kursantlara və Dövlət Bayrağı Gününə həsr edilmiş inşa yazı müsabiqəsinin
qaliblərinə AHİK-in diplomları və qiymətli hədiyyələri, eyni zamanda sahə həmkarlar
ittifaqı respublika komitələrinin pul mükafatları təntənəli surətdə təqdim edilib.
Liseyin Azərbaycan dili və ədəbiyyat müəllimi Səbinə Qafarova isə AHİK-in Fəxri
Diplomu ilə təltif olunub.
Mədəniyyət və Turizm İdarəsinin təşkilatçılığı ilə
hazırlanmış bədii hissədə “Aysel” rəqs ansamblının ifasında bayrağa həsr
olunmuş xoreoqrafik kompozisiya, liseyin mühafizə işçisi Asif Hacıyevin oğlu ilə
birgə ifa etdiyi duet, tanınmış müğənnilər Nurlan Əzizbəyli, Vüsal Hacıyev və
İlahə İbadovanın Azərbaycana, Dövlət bayrağına, Vətənə həsr edilmiş mahnıları
tamaşaçılar tərəfindən maraqla qarşılanıb.
Tədbirin sonunda şəxsi heyətlə iş üzrə lisey rəisinin
müavini, şöbə rəisi, polkovnik Müslüm Nəsibov bütün tədbir iştirakçılarına öz
minnətdarlığını bildirib. O, gənclərə göstərilən diqqət və qayğıya görə AHİK-ə
xüsusi təşəkkür edərək, bu hamilik missiyasının gənclərin hərbi vətənpərvərlik
tərbiyəsində böyük rol oynadığını qeyd edib.
