Müzakirə olunan mövzu dövrün aktual məsələlərindəndir
04 Oct 2018
“Layiqli əmək Azərbaycan Respublikasında milli iqtisadiyyatın və sosial siyasətin əsas istiqamətlərindən hesab olunur.
Təsadüfi deyil ki, hazırlanmasında həmkarlar ittifaqının
da iştirak etdiyi, 2016-2020-ci illər üçün Layiqli Əmək üzrə Ölkə Proqramı qəbul
edilmişdir. Bu Proqramın yerinə yetirilməsini təmin etmək məqsədilə Azərbaycan
Həmkarlar İttifaqları Konfederasiyası uzunmüddətli tədbirlər planı işləyib
icrasını uğurla həyata keçirir”.
Bu sözlər oktyabrın 4-də Dövlət İdarələri və İctimai Xidmət
İşçiləri Həmkarlar İttifaqı Respublika Komitəsinin Saatlı rayonunda “7 Oktyabr
- Ümumdünya Layiqli Əmək Günü”nə həsr olunmuş “Yeni nəslin sağlamlığı və təhlükəsizliyi”
mövzusunda təşkil etdiyi zona seminarına məruzədə səslənmişdir. Məruzə ilə
çıxış edən sahə Respublika Komitəsinin sədr müavini Əbülfəz Mehdiyev demişdir
ki, müzakirəsinə toplaşdığımız mövzu müasir dövrümüzün olduqca aktual məsələlərindəndir.
Beynəlxalq Əmək Təşkilatının həyəcan doğuran statistik məlumatlarına görə,
dünyada hər il zərərli və təhlükəli əmək şəraiti nəticəsində iki milyona yaxın
işçi həyatını itirir.
Bir sıra səbəblərə görə gənc işçilər daha çox risk
qrupuna daxil olurlar. Bu səbəblərə təcrübəsizlik, iş yerlərində mövcud təhlükələrin
və qəza vəziyyətinin tam dərk edilməməsi, təhlükəsizlik texnikası və əməyin
gigiyenasına dair biliklərin və təcrübənin azlığı, qanunvericilik barədə biliklərin
zəif olması və s. daxildir.
Ə.Mehdiyev ölkəmizdə də gənclərin təhlükəsizliyi və
sağlamlığı sahəsində vəziyyətin bir o qədər də qənaətbəxş olmadığını diqqətə
çatdırıb. “Respublika Statistika Komitəsinin məlumatları da bunu təsdiq edir:
“2016-cı ildə istehsalatda baş vermiş bədbəxt hadisələr üzrə zədə alanların
sayı 92 nəfər olmuşdur. Bunlardan 40 nəfəri 18-29 yaş arasında olan gənclərdir.
Doğrudur, həmkarlar ittifaqının xidmətində olan müəssisələrdə işçilərin təhlükəsizliyi
baxımından vəziyyət xeyli yaxşıdır. Amma tam qənaətbəxş deyil. Baxmayaraq ki,
“xəsarətsiz istehsalat” məqsədini qarşıya qoyan həmkarlar ittifaqı təşkilatları
böyük işlər görür. Tərəfdaşları ilə bağladığı Baş Kollektiv Sazişdə çalışır ki,
bu məsələ konkret, dəqiq və ətraflı əksini tapsın. Hər il “Əməyin mühafizəsi və
sağlam istehsalat” devizi altında Respublika baxış-müsabiqəsi keçirir. Qaliblər
mükafatlandırılır. Yeri gəlmişkən bizim ittifaqın da müəssisələri bu müsabiqədə
fəal iştirak edir və bir neçəsi qaliblər sırasında yer tutur”.
Ə.Mehdiyev çıxışının sonunda əmin olduğunu bildirib ki,
seminar iştirakçıları öz ərazilərində, müəssisələrində layiqli əmək prinsipinin
pozulmaması istiqamətində fəaliyyətlərini, xüsusilə də maarifləndirmə işini
daha da gücləndirəcəklər.
14 saylı Region üzrə Dövlət Əmək Müfəttişliyinin baş əmək
müfəttişi Əliyar Əmirov çıxışında qeyd edib ki, son illər istehsalatda təhlükəsizliyə
nail olmaqdan ötrü mühüm addımlar atılıb. İş yerlərinin normalara
uyğunlaşdırılması diqqətdə saxlanılır. Keçirdiyimiz yoxlamalar da mənə deməyə əsas
verir ki, layiqli əməyə diqqət təkcə işçilərin sağlamlığının, təhlükəsizliyinin
qorunmasına deyil, həm də iqtisadi göstəricilərin yüksəlməsinə ən yaxşı təminatdır.
Ə.Əmirov bu sahədə dövlət əmək müfəttişliyinin həmkarlar
ittifaqı ilə əməkdaşlığının səmərəsindən də danışıb.
Sahə Hİ Respublika Komitəsinin sədr müavini Əbülfəz
Mehdiyev və baş texniki əmək müfəttişi Valeh Nağıyev oktyabrın 2 və 4-də
Hacıqabul, Şirvan, Sabirabad, Saatlı, İmişli və Beyləqan rayonlarında üzv müəssisə
və idarələrdə işçilərin iş şəraiti ilə tanış olublar.
