Qarşılıqlı maraq ödənilirsə əməkdaşlıq üçün problem olmur
07 Dec 2018
Sahibkarlıq, Özəl Elm və Yüngül Sənaye İşçiləri Həmkarlar İttifaqı Respublika Komitəsinin dekabrın 7-də keçirilmiş plenumunda “Üzv müəssisə və təşkilatlarda kollektiv müqavilələrin bağlanmasında həmkarlar ittifaqının rolu” məsələsinə baxılıb.
Gündəliyə çıxarılmış bu məsələ barədə Respublika Komitəsinin
sədri Məhəmmədəli Salmanovun məruzəsi dinlənilib. Məruzəçi bildirib ki, AHİK-in
V qurultayında qəbul olunmuş əsas fəaliyyət istiqamətlərində qarşıya qoyulmuş vəzifələrin
yerinə yetirilməsi işində kollektiv müqavilələr mühüm əhəmiyyət daşıyır. Hər
bir kollektiv müqavilə işçilərin əmək, sosial maraqlarının müdafiəsi, istirahətinin
təşkili sahələrini konkret, geniş şəkildə özündə ehtiva etməlidir. Son məlumatlara
görə, sahə üzrə 1320 ilk təşkilat işəgötürənlərlə kollektiv müqavilə bağlayıb.
Etiraf edək ki, özəl sektorlarda belə bir sənədin hasilə gəlməsi olduqca çətindir.
Özəl sektorda əksər müəssisə rəhbəri işçilər qarşısında öhdəlik götürməyə
ehtiyatla yanaşır. Təbii ki, biz bu qisim sahibkarlarla uzunmüddətli maarifləndirmə
işi aparırıq.
Söhbətlərimizdə daha çox onların maraqlarını qabardırıq.
İnandırmağa çalışırıq ki, kollektiv müqavilədə götürülən öhdəliklərin
icrasından həm işəgötürən, həm də işçi faydalanacaq. Sonrakı müddət dediklərimizin
dürüstlüyünü ortaya qoyur. Sağlam iş şəraiti yaranır. Onun hesabına istehsal
göstəriciləri, müəssisənin və işçilərin gəlirləri çoxalır. İşçilər vaxtaşırı
tibbi müayinədən keçirilir. Zərərli işdə çalışanların qida, digər təminatı diqqətdə
saxlanılır. Beləliklə, xəstəliyə görə işburaxma halları minimuma endirilir.
AHİK-in hər il keçirdiyi “Sağlam və təhlükəsiz əmək şəraitinin
yaradılması üzrə ən yaxşı müəssisəsi (təşkilat)” Respublika müsabiqəsində sahə
üzrə iştirakçı müəssisələrin sayı get-gedə artır. Sevindirici haldır ki, qaliblər
sırasına çıxan müəssisələrimiz də olur. Respublika Komitəsi onları
mükafatlandırmaqla digər müəssisələrin də sağlam iş mühiti yaratmaq istəyini
stimullaşdırır.
Məruzədə Respublika Komitəsinin təşkil etdiyi mədəni-kütləvi
tədbirlər, idman yarışları, mövsümi turist səfərləri, dövlət, milli və dini
bayramlar münasibətilə keçirilən görüşlərdən, yığıncaqlardan da söz açılıb.
Bildirilib ki, fəal əməli işimizin nəticəsidir ki, plenumlararası müddətdə
sıralarımız xeyli genişlənibdir. Təkcə son bir ildə “AzərGold” QSC, “Veysəloğlu
- Yaycılı Qardaşlar” ASC, “Günəşli” İKF, “Biləv”MMC, “Litterpress MMC və sair təşkilatlarda
ilk həmkarlar ittifaqı komitələri yaradılıb. Həmin komitələr konfrans keçirərək
birbaşa Respublika Komitəsinin xidmətinə daxil olmaq barədə qərar qəbul ediblər.
Respublika Komitəsinin sədr müavini Mehman Fərzəliyev təşkilatın
maliyyə fəaliyyəti barədə hesabat verib. Hər iki hesabat ətrafında çıxışlar
dinlənilib.
Sonda
müvafiq qərar qəbul olunub.
