“Təbib” İstirahət Mərkəzinin yeni korpusu istifadəyə verilib
29 Jun 2019
Bu tədris ili üçün Azərbaycan Tibb Universitetinin (ATU) Böyük Elmi Şurasının yekun iclası Xaçmazın Nabran qəsəbəsində yerləşən “Təbib” İstirahət Mərkəzində keçirilib.
İclasda tədris ilinin yekunları ilə bağlı məsələlər
müzakirə olunub, bəzi qərarlar təsdiqlənib.
Şura iclası ilə yanaşı, burada həm də istirahət mərkəzinin
yeni korpusunun açılışı keçirilib. ATU-nun rektoru, professor Gəray Gəraybəyli
istirahət mərkəzində hər il yeni korpusların açılmasını sevindirici hal kimi
qiymətləndirib. Rektor mərkəzdə mütəmadi olaraq abadlıq işlərinin aparıldığını,
iki il öncə müasir yeməkxananın qurulduğunu, ötən il isə təmir olunmuş ilk
korpusun açılışının keçirildiyini xatırladıb.
ATU-nun Həmkarlar İttifaqı Komitəsinin sədri, dosent
Cahangir Qasımovun sözlərinə görə, abadlaşma işləri komitə tərəfindən maliyyələşdirilir.
Bu il istifadəyə verilən korpusda 4 nəfərlik 7 otaq, 2 nəfərlik
3 otaq fəaliyyət göstərir. Otaqlar istirahət edənlərin rahatlığı üçün lazımi
avadanlıq və şəraitlə təmin olunub. Bu il, həmçinin mərkəzdə qazanxana da
quraşdırılıb. Bu, gələcəkdə “Təbib” İstirahət Mərkəzinin qış mövsümündə də fəaliyyətinə
imkan yaradacaq.
