Turizmin inkişafında mühüm amillərə diqqət yetirilməlidir
05 Oct 2018
“Xidmət-İş” Həmkarlar İttifaqları Federasiyası Gənclər Şurasının təşəbbüsü ilə Ümumdünya Turizm Gününə həsr olunmuş “Azərbaycan 2020: gələcəyə baxış” adlı inkişaf konsepsiyasında turizmin inkişaf strategiyası” devizi altında dəyirmi masa keçirilib.
Həmkarlar ittifaqı liderləri, turizm və otel sahə işçiləri
nümayəndələrinin iştirak etdikləri tədbiri Federasiyanın vitse-prezidenti
Cəmaləddin İsmayılov açaraq məlumat verib ki, BMT-nin Beynəlxalq Turizm Təşkilatının
1979-cu il sentyabrın 27-də Ümumdünya Turizm Gününü təsis etməkdə başlıca məqsədi
turizmin təbliği, onun sosial, mədəni, siyasi və iqtisadi tərəflərini dünya
miqyasında nümayiş etdirmək, müxtəlif ölkə xalqları arasında sıx əlaqələrin
yaradılmasıdır. 2001-ci ildən Azərbaycan Beynəlxalq Turizm Təşkilatının
üzvüdür. Həmin gün sahədə çalışan bütün turizm şirkətlərinin əməkdaşları, muzey
işçiləri, mehmanxana komplekslərinin rəhbərləri və işçi heyətinin peşə bayramı
kimi qeyd olunur. Ölkəmiz turizm sahəsinin inkişafı üçün zəngin imkanlara
malikdir. Bunun nəticəsidir ki, bu ilin 7 ayı ərzində respublikamıza 1,700 minə
yaxın turist gəlib. “Azərbaycan 2020: gələcəyə baxış” inkişaf konsepsiyasında
da ölkədə turizmin inkişafı üzrə müvafiq hədəf və məqsədlər əks olunub. Bu
konsepsiya gənc kadrların gələcəkdə işlə təmin olunmasına çox böyük töhfə verəcək.
Azərbaycan Kooperasiya Universitetinin marketinq və
turizm xidməti kafedrasının müdiri, dosent Gülnisa Mustafayeva çıxışında qeyd edib
ki, turizmin inkişafına nail olmaq üçün sahələrdə dünya standartlarına uyğun xidmət
edə biləcək kadrlar çalışmalıdır.
Turizm sahələrinin inkişaf etdirilməsi və peşəkar
kadrların sayının artırılmasının vacibliyi onların nəzəri biliklərə yiyələnməsi
ilə yanaşı, turizm şirkətləri və otellərdə təcrübə keçmələrini zəruri edir.
“Nyu Baku” otelinin və “Skaut” birliyinin rəhbəri Ceyhun
Aşurov, “Bakı Turizm Ekskursiya” MMC-nin direktoru Əlixan Mürvətov təklif
ediblər ki, otellərlə təcrübə keçmək üçün işəgötürən və təhsil ocaqları
arasında müqavilə bağlanmalıdır, Turizm Agentliyi ilə həmkarlar ittifaqının
birgə məlumat bazasının yaradılması da zəruridir.
Digər otel sahibləri çıxışlarında təəssüflə qeyd ediblər
ki, Təhsil Nazirliyi yay mövsümündə gələcək kadrların təcrübəsini qadağan etmiş
və bu təcrübə qış aylarına keçirilmişdir. Bu isə kadrların keyfiyyətli və peşəkar
hazırlığına mənfi təsir edir.
“Xidmət-İş” Hİ Səbail Rayon Komitəsinin sədri Tofiq Qədimov,
Xətai Rayon Komitəsinin sədri Roza Eyyubova müzakirələr zamanı təklif
veriblər ki, irəli sürülmüş tələbləri gerçəkləşdirmək üçün təmsil olunan müəssisələrdə
həmkarlar ittifaqı təşkilatının yaradılması zəruri
olardı.
Sonda C.İsmayılov vurğulayıb ki, bütün çıxışlarda toplantı
iştirakçıları gənclərin öz sənətinə mükəmməl yiyələnməsi üçün lazımi şərait
yaradılmadığını bildirriblər. Buna görə də Federasiya tərəfindən gənclər üçün
“Həyati əhəmiyyətli qərarlar” mövzusunda maarifləndirici seminarlar keçirilməlidir.
