Türkiyənin təhsil işçiləri həmkarlar ittifaqının nümayəndələri AHİK-də qəbul edilib
01 May 2019
Mayın 1-də AHİK-in sədri, Milli Məclisin deputatı Səttar Möhbalıyev Türkiyənin “Egitim-Bir-Sen” Təhsil İşçiləri Həmkarlar İttifaqı Komitəsinin Bakıda səfərdə olan nümayəndələrini qəbul edib. Qeyd edək ki, beş yüz min ittifaq üzvünü özündə birləşdirən “Egitim-Bir-Sen” Türkiyənin ən böyük təhsil işçiləri həmkarlar ittifaqı təşkilatıdır.
Qonaqlara
Azərbaycan Təhsil İşçiləri Azad Həmkarlar
İttifaqı haqqında məlumat verən S.Möhbalıyev bildirib ki, İttifaq öz sıralarında 400 minə yaxın təhsil
işçisini birləşdirir. Onların da əhəmiyyətli hissəsini tələbələr təşkil edir. Təhsil
işçilərinin qarşılaşdıqları problemlər, qayğılar, onların əmək hüquqlarının
qorunması, istirahətlərinin təşkili və
digər məsələlər gündəlik olaraq sahə həmkarlar ittifaqının diqqət mərkəzindədir. AHİK sədri qeyd edib ki, təhsil işçilərinin və
onların ailə üzvlərinin istirahətlərinin səmərəli təşkili məqsədilə Təhsil İşçiləri Həmkarlar İttifaqının vəsaiti
hesabına respublikanın səfalı güşələrindən birində yaradılmış böyük
istirahət mərkəzi fəaliyyət göstərir. Mərkəzdə istirahət edənlərin
vaxtlarını maraqlı keçirməsi, müalicə alması, yaxşı dincəlməsi üçün hər cür şərait
yaradılıb. Bundan əlavə, onların respublikanın digər sanatoriya-kurort müəssisələrində
istirahətinin təşkili üçün də mövsüm ərzində lazımi tədbirlər görülür.
S.Möhbalıyev
vurğulayıb ki, həmkarlar ittifaqı üzvü olan tələbələrə hərtərəfli qayğı göstərilməsi
fəaliyyətimizin vacib sahələrindəndir. Tələbələr dövlətdən aldıqları təqaüdün 2
faizini həmkarlar ittifaqının hesabına köçürürlər. Biz isə bunun qarşılığında
onların istirahətlərini təmin edirik, mədəni-kütləvi, idman tədbirləri təşkil
edirik, problemləri ilə yaxından maraqlanırıq. Həmkarlar ittifaqı təşkilatları
tərəfindən dövlət gənclər siyasətinə uyğun olaraq bu istiqamətdə müxtəlif
intellektual oyunlar, idman yarışları təşkil olunur, gənclərin asudə
vaxtlarının səmərəli təşkili ilə bağlı işlər görülür. Qeyd etmək istəyirəm ki,
aztəminatlı ailələrdən olan gənclərin sosial təminatının gücləndirilməsi ilə
bağlı da addımlar atılır. Belə ki, hər il Təhsil İşçiləri Həmkarlar İttifaqı tərəfindən
aztəminatlı ailələrdən olan 220-dən artıq tələbə pulsuz yeməklə təmin olunur.
Yaxud yay imtahan sessiyasının nəticələrinə görə əlaçı və həmkarlar ittifaqı fəalı
olan ali məktəb tələbələrinə İttifaqın adlı təqaüdləri verilir. Lap bu günlərdə
ali məktəb tələbələrinin Respublika Universiadasının açılışını keçirdik.
Universiadada 16 ali məktəb müəssisəsinin tələbələri iştirak edirlər. Həmin
yarışlar idmanın 10 növü üzrə keçiriləcək və ümumilikdə min nəfərdən artıq tələbəni
əhatə edəcəkdir. Belə misalları çox gətirmək olar və məqsədimiz Təhsil işçiləri
Həmkarlar ittifaqqının gördüyü işlərlə sizi tanış etməkdir. Bu istiqamətdə fəaliyyətimizi
daha da genişləndirmək əzmindəyik.
AHİK sədri
daha sonra ümumilikdə Azərbaycan Həmkarlar İttifaqlarının fəaliyyəti və həyata
keçirdiyi işlər barədə qonaqları məlumatlandırıb. Görüşdə qarşılıqlı maraq doğuran məsələlər müzakirə
olunub.
